Во моментов во промет немало неисправни автобуси, вели директорот на ЈСП, Драги Кушовски, според информациите со кои тој располагал. Но, додаде дека во „изминатиот период“ два автобуси им биле исклучени од сообраќај по спроведен технички преглед. Смирува дека пронајдените недостатоци не биле од суштествена природа
До скоро, немале клима-уред 27 автобуси. Мал дел се поправени, но за другите се чекаат делови од Кина
Според информациите со кои расплага директорот на ЈСП, Драги Кушовски, во моментов на улица нема неисправни автобуси на градското претпријатие. Така вели во интервју за ТВ Телма, кое доаѓа во месец во кој еден градски автобус се запали, друг се излизга на жардиниера, синдикатот обвини дека во промет се пуштаат неисправни возила, а редакцијата на „360 степени“ објави две истражувачки стории – дека е истечено каско осигурување за возилата на ЈСП и дека повеќето автобуси на ЈСП немаат целосно исправна светлосна сигнализација.
Сепак, додаде Кушовски, во „изминатиот период“ имало автобуси кои биле исклучени од сообраќај. А, за дел од оштетувањата на возилата индиректно ја обвини и градската власт и другите јавни претпријатија, велејќи дека некои недостатоци се поради улиците и висината на автобусите.
„Според моите информации што ги имаме, во моментов нема. Во изминатиот период имаме неколку, два автобуси мислам дека беа, што се исклучени од сообраќај за да бидам транспарентен и искрен, коишто се исклучени од сообраќај на технички преглед, но не за суштествени неисправни работи како систем за кочење, волан или било што. Туку, за неработење на некое штоп-светло или несоодветна, можеби во моментот, прегорена сијалица или пукнатина на некое стакло коешто тековно… знаете какви се кај нас улиците низ градот, каде што автобусите се високи и секојдневно настанува нивно оштетување“,
изјави за ТВ Телма, Драги Кушовски, директор на ЈСП.
Следното прашање беа клима-уредите. Се жалат и граѓаните и возачите, дека за време на топлиот бран кога дневните температури достигаа и до 40 степени, тешко е да се биде патник, а камоли возач.
„Автобусите сите имаат клима-уреди, но во моментов, сега во базата во Ѓорче Петров, до пред два дена имаше 27 автобуси коишто беа со неисправни клима-уреди, во моментов на седум е отстранет тој дефект и во моментов имаме околу 20 автобуси коишто се подложени на сервис за клима-уредите. За дел од тие чекаме и резервни делови да стигнат, бидејќи знаете дека се од Кина и малку испораката на резервни делови оди поспоро“,
кажа директорот на ЈСП.
Според Кушовски, ЈСП нема проблем со бројот на возачи. Имаат постојан прилив.
На прашањето, пак, дали проблемите во претпријатието се должат на т.н. бесплатен превоз за ученици, студенти, пензионери, тој одговори – делумно да. Не посочи кој, но кажа дека некои институции доцнат со исплатата.
„Делумно може да се каже да. Но, повеќе е затоа што дел од тие категории што ги спомнавте, институциите коишто треба да го извршат плаќањето према ЈСП ‘Скопје’ ненавремено ги измируваат своите обврски. Тие се субвенции за студенти. Ненавремено се извршуваат обврските и тука настанува проблемот во функционирањето на ЈСП ‘Скопје’“,
додаде Кушовски.