Пратеникот од ВМРО-ДПМНЕ, Илија Димовски, вели дека премиерот Зоран Заев е тој што бара можни начини како да ги одложи изборите одговарајќи на прозивката од Заев дека поради кочењето на донесувањето важни закони можно е да се одложат изборите најавени за 12 април.
„Цело време се обидува да предизвика несогласувања и во Собранието, меѓу коалициските односи во неговата влада и со разни идеи само за да избега од изборите. Веројатно во текот на вчерашниот ден добил нови анкети на својата маса и видел дека трендот на поддршката што тој ја има е во екстремно надолна линија“, рече Димовски на прес-конференцијата во Собранието.
Тој на обвинувањата од Заев рече дека опозицијата никогаш не правела проблем во Собранието за суштинските закони, туку реагирала кога се кршел Деловникот. „Правиме проблем кога се ставаат на дневен ред точки кои не исполнуваат деловнички услови да бидат ставени на дневен ред како точки. Правиме проблем кога се блокира Собранието во една недела со 300 закони, а во целиот мандатен период од три години наназад нема донесено 300 закони. Правиме проблем кога на опозицијата не ѝ се дава основно право од 130 точки да предложи барем една точка на дневен ред за која ќе се разговара. Во конкретниот случај тоа беше нашата идеја да разговараме за аерозагадувањето и животната средина“, рече Димовски.
Доколку во Собранието не бидат донесени суштинските закони кои се значајни за животот на граѓаните, тогаш изборите може и да се одложат, изјави денеска премиерот Зоран Заев, но не прецизираше на кои закони мисли.