Германскиот државен министер за Европа, Михаел Рот, заедно со македонскиот министер за надворешни работи Никола Димитров на заедничка виртуелна прес-конференција разговараат за предизвиците што ги донесе коронавирусот.
Димитров рече дека во овие тешки моменти заедно со колегата од Германија сакаат да демонстрираат пошироко европско заедништво и солидарност.
„Како што беше со мигрантската криза така е и со ковид-19. Вирусот нема национален идентитет, не познава граници, религии, ги напаѓа сите луѓе. Би било добро доколку Европската Унија ја разгледа можноста, освен за своите земји членки, помош за справување со овој вирус да понуди и за земјите од овој регион“,
додаде Димитров.
Германскиот државен министер Рот даде поддршка за земјава и за предизвикот со кој се бориме поврзан со коронавирусот, но и за процесот кон европската иднина.
„Овој период е тежок и е предизвик дури за земја развиена како Германија. Во овие моменти е најважна солидарноста и препораките за заштита на нашето здравје. Тоа што се случува во Европа ќе има влијание, а Европската Унија ќе направи сè да ви помогне да ви пребродите овие моменти“,
додаде Рот.
Тој додаде дека сега, грижата е за последиците од коронавирусот, бидејќи вирусот не го става на проба само балканскиот регионот, туку целиот свет. Но, што се случува со вирусот во Европа, ќе има влијание и последици, рече Рот, па затоа ЕУ ќе направи напори да си помогне и на себе си и на земјите од овој регион.
„Обврска е од страна на Европската Унија да вложи во стабилност на Западниот Балкан, а ИПА-фондовите се еден од инструментите. Во моментов преговараме во ЕУ за иднината, за финансиите. Од мојата гледна точка е многу важно ЕУ соодветни економски средства да даде на располагање за економската и социјалната положба во Северна Македонија“,
рече министерот Рот.