„Без почеток на преговори годинава нема ЕУ-перспектива за С. Македонија“ – предупреди шефот на дипломатијата на денешната министерска панел-дискусија посветена на Западниот Балкан што се одржува во Стокхолм. Според Димитров Унијата не може да биде целосна без Западниот Балкан и затоа повика на „комплетирање“ наместо на „проширување“ на ЕУ.
„Во ЕУ имаме еден остров што не е ЕУ е опкружен од земји-членки, а тоа е Балканот“ – изјави Димитров. Според него забуната што се прави во некои европски престолнини е мешањето на поимите „комплетирање“ со „миграција“. „Колку повеќе ја имаме Европа дома, толку нашите млади ќе имаат помалку причини да ги напуштат своите домови и европскиот начин на живеење“. За Димитров најголемата битка на неговата генерација ќе биде да ја задржи наредната генерација дома. Затоа, тој инсистира на зајакнување на ЕУ-перспективата преку почеток на преговори годинава.
„Морам да бидам искрен зашто јас сум „случаен политичар“ и мислам дека ни треба повеќе искреност во домашната политичка дебата, но и во дебатата надвор. Мислам дека доколку наредната година треба да имаме 11 препорака на ЕК за почеток на преговори, јас нема да можам да разговарам со моите сограѓани со сериозно лице и притоа да им зборувам за ЕУ-перспективата. Жал ми е што морам ова да го кажам, но ако не почнеме преговори за членство оваа година тогаш тоа за мене ќе значи дека нема ЕУ-перпсектива. Се плашам дека по се она што го направивме за 2 години, а тоа е очигледно демократско свртување. Се уште правиме грешки, не сме совршени, но во земјата има очигледно придвижување кон европската либерал-демократија управувана во владеењето на правото“ – изјави министерот Димитров.
Димитров денеска се среќава и со министерката за надворешни работи на Шведска, Маргот Валстром, и со претседателот на Парламентот, Андреа Норлен.