Според министерката за финансии, кај двете друштва било констатирано дека не ги почитувале законските одредби, односно не ги платиле давачките утврдени со Законот за игри на среќа и за забавните игри и Законот за личен доход
Прашана дали засегнатите фирми се поврзани со поранешни функционери, Димитриеска-Кочоска одговори: „Тоа дополнително ќе треба да се истражува од страна на надлежните“
Министерството за финансии иницирало постапка до Владата за одземање на лиценците за приредување игри на среќа на две друштва поради неисполнување на условите предвидени со издадените лиценци.
Ова денеска на прес-конференција го соопшти ресорната министерка Гордана Димитриеска-Кочоска, која воедно информира дека се поднесени и барања до Финаниската полиција и до Секторот за организиран криминал при Министерството за внатрешни работи (МВР), кои, како што кажа, треба да ја утврдат фактичката сотојба, односно да истражат дали и во колкав обем е оштетен буџетот на државата.
Според министерката за финансии, кај двете друштва било констатирано дека не ги почитувале законските одредби, односно не ги платиле давачките утврдени со Законот за игри на среќа и за забавните игри и Законот за личен доход. Меѓу нив, како што кажа таа, се посебните давачки, како и данокот на личен доход од исплатени добивки на игри на среќа и други неправилности.
Министерството за финансии, според Димитриеска-Кочоска, ја иницирало постапката откако го добило записникот од Управата за јавни приходи (УЈП) кое како надзорен орган извршило контрола над работењето на овие две друштва.
Министерството, како што посочи министерката, до УЈП поднело барање за вакви контроли уште лани, но тие биле реализирани во јуни годинава по доаѓањето на новото раководство во Управата.
„Согласно доставената документација од Управата за јавни приходи, а согласно извршената надворешна контрола е констатирано дека за едно од друштвата за кое е иницирана постапката за одземање на лиценца не се платени давачки од јули 2022. Притоа нагласуваме дека првичното барање од Министерството за финансии до Управата за јавни приходи е доставено уште во јули 2023 година, по што се направени неколку ургенции на што е постапено од страна на Управата дури во јуни 2024 година откако во Управата за јавни приходи доаѓа новото раководство“,
изјави Димитриеска-Кочоска.
Министерката дополнително информира и дека денеска Министерството за финансии до надлежните органи доставило барање за, како што кажа, преиспитување на законитоста во постапувањето на приредувањето интернет-игри на среќа, а во делот на исполнувањето на условите и поседувањето лиценца согласно законот од страна на друштвата кои приредуваат интернет-игри на среќа.
„Инаку, во тек се активности за утврдување на евентуални неправилности согласно издадените лиценци и кај другите приредувачи на игри на среќа, и доколку се утврдат такви, веднаш ќе бидат иницирани соодветни постапки“,
додаде министерката за финансии.
Одговарајќи на новинарски прашања, Димитреска-Кочоска не сакаше да открие за кои две фирми приредувачи на игри на среќа станува збор.
„Ако ме слушавте внимателно, доставивме дописи до Финаниска полиција и до Организиран криминал при Министерството за внатрешни работи и во интерес на истрагата, односно на постапката, ајде да не ја наречеме истрага, не би сакала пред време воопшто да информирам околу имињата на тие трговски друштва“,
рече таа.
Единствено што откри е дека една од фирмите не е од Скопје.
Во врска со тоа дали има штети кон Буџетот, Димитриеска-Кочоска рече дека има затоа што не биле платени давачки кои согласно закон требало да бидат подмирени.
„Да бидеме појасни, фирмите се основани, барем едната, во детали ја истражувавме, за другата малку пократок временски период, сакав побрзо да бидеме во согласност со законот, е основана 2022 година. Од 2022 година до денес нема ниту еден денар платено било каква давачка кон Буџетот и сето тоа е констатирано во записник од страна на Управата за јавни приходи. Значи, дали има одредени оштетувања кон Буџетот – има, затоа што има пред сè давачки коишто согласно законот требало да ги плаќа. Министерството за финансии во континуитет доставувало ургенции и барања до Управата за јавни приходи во изминатите години и ниту еднаш не било одговорено ниту на еден допис, ниту, пак, на ургениција. Првпат одговор добивме откако дојде новата директорка (Елена Петрова н.з.). И токму заради тоа можам да кажам дека има штети бидејќи, еве, основните давачки не се платени. Е сега во колкав обем, треба да утврдат надлежните органи затоа што треба да знаeме колку работеле, што работеле итн. Врз основа на испитувањата што ќе ги направат, ќе знаеме повеќе детали“,
рече министреката одговарајќи на новинарско прашање.
Прашана дали засегнатите фирми се поврзани со поранешни функционери, Димитриеска-Кочоска одговори:
„Тоа дополнително ќе треба да се истражува од страна на надлежните“