Државната изборна комисија (ДИК) го заклучи Избирачкиот список за изборите за градоначалник, кои на 13 декември треба да се одржат во Штип и Пласница. Во Штип право на глас имаат 41 777 гласачи, додека во Пласница 4 954 гласачи.
„По промените што се направени, ДИК го заклучува Избирачкиот список со следнава состојба: За градоначалник на Општина Штип вкупен број запишани избирачи во Избирачкиот список има 41 777, од нив во изводите од Избирачкиот список за гласање во Општина Штип се запишани 39 605 гласачи, во посебниот избирачки список што се однесува на лица кои се на привремен престој или работа во странство се запишани 2 103 лица, во посебниот избирачки список за лица кои се во затвор или во притвор се запишани 67 граѓани и лица згрижени во домови за вонсемејна заштита се двајца гласачи“,
изјави потпретседателката на ДИК, Дитмире Шеху.
Во Пласница право на глас имаат 4 954 гласачи, од нив во странство се запишани 372 и еден гласач е во затвор или притвор.
ДИК на седницата го усвои Упатството за гласање на избирачки места со помалку од десет гласачи. Од вкупно 89 избирачки места во Штип и Пласница во четири избирачки места има помалку од десет избирачи. Овие лица ќе можат да гласаат на најблиското избирачко место.
Утре почнува изборната кампања за локалните избори во Штип и Пласница, кои треба да се одржат во најспецифични услови досега, имајќи ја предвид состојбата со ковид-19. Изборите се на 13 декември, а два дена претходно треба да гласаат лицата со ковид-19.