Државната изборна комисија „зазеде“ став дека сѐ додека нема приговор телото нема да се произнесе за случајот во кој вицепремиер и учесник во изборите ја искористи социјалната мрежа Фејсбук за споделување политички ставови.
„До овој момент нема поднесено таков приговор од никого. Ако има, ДИК би се произнела на седница“,
е целосниот одговор што „360 степени“ го доби од институцијата.
Како што веќе објави „360 степени“, дискутабилниот случај се случи денеска, односно по започнувањето на изборниот молк. Учесникот во изборите дал интервју за странска телевизија во кое зборува за изборите и за новата влада и тоа го споделил на својот фејсбук-профил.
Во изјава за „360 степени“ вицепремиерот изјави дека нема забрана за комуникација со пријатели на социјалните мрежи преку приватен профил.