Вели дека дека има воспоставено и лична комуникација со министрите и со замениците и дека тие можат секогаш да го побараат
Многу одамна сум кажал дека не сум политичар од Фејсбук, па соодветно на тоа не сум премиер кој се раководи со изјави по Фејсбук. Јас сум премиер на оваа влада, а членовите на Владата ќе треба соодветно да се изјаснат, официјално, во ситуација кога имаат спротивставени ставови. Ова го изјави премиерот на преодната влада, Талат Џафери во интервју за државната агенција МИА на прашање дали по поделбите кои се случија изминатиот викенд во партијата Алијанса на Албанците, владината коалиција е стабилна, особено што тројца министри од нејзините редови се во владиниот состав.
„Не можам да се раководам по она што се случува по телевизии и по конференции партиски. Членовите на Владата треба да се изјаснат по институционална линија дали имаат чувство на припадност на овој состав или не“,
рече Џафери.
Премиерот Џафери на прашањето дали ќе побара смена на министрите кои не се согласуваат со владината коалиција рече дека ја следи ситуацијата во Алијанса за Албанците и ќе постапи согласно неговите надлежности, односно ќе се раководи од институционалната постапка и соодветно на тоа ќе одлучи каков ќе биде исходот.
Вели дека има воспоставено и лична комуникација со министрите и со замениците и дека тие можат секогаш да го побараат.
„Јас сум премиер на Владата и сум излегол пред Собранието со предлог на состав на Владата и програма, и моите надлежности се да ја следам работата на Владата, да констатирам дали сите членови на Владата се во рамки и во правец на исполнување на она што е програмска определба, за што овој состав добил поддршка соодветно од Собранието. Секако, не спорам во правото на учесниците да ги преиспитаат своите ставови во однос на учеството во Владата така што секој еден член на Владата е слободен да се изјасни во однос на својот статус понатамошен во Владата. Моето е да следам и во меѓувреме сходно на однесувањето и изјаснувањето и да постапам во рамки на моите надлежности, а моја надлежност во такви ситуации како крајна е да излезам пред Собранието со други предлози и уставни надлежности кои ми се, но во секој случај по соодветни консултации во однос на ситуацијата. Јас ја следам состојбата. Не ги коментирам состојбите“,
изјави Џафери во интервју за МИА.
Алијанса за Албанците изминатите денови е во центарот на вниманието откако во саботата Фејсбук стана арената во која првенците на Алијанса за Албанците ги потврдија шпекулациите за длабоките разлики во врвот на партијата за тоа како и со кого да се настапи на претстојните парламентарни избори.
Лидерот на Алијанса за Албанците, Арбен Таравари, на Фејсбук напиша дека бара поддршка од Централното собрание за да им се приклучат на опозициските партии на Албанците.
На ова реагираше генералниот секретар на АА и министер за правда Кренар Лога, кој напиша оти партијата веќе одлучила дека на изборите ќе оди самостојно. Му се приклучи претседателот на Централното собрание и поранешен лидер на Алијанса за Албанците, Зијадин Села, кој го обвини Таравари дека има шверцерски тенденции и напиша оти тој како поединец не одлучува за чекорите на партијата, туку партиските тела.