Министерот за правда Кренар Лога со делегација в четврток (8 февруари) ќе престојува во Анкара, каде што е предвидено да се сретне со официјални турски претставници, а едно од прашањето за коишто ќе се разговара е и екстрадицијата на Палевски, потврдуваат од Правда
Техничкиот премиер Талат Џафери не сака да прејудицира дали разговорите што министерот за правда Кренар Лога ќе ги има во Турција за два дена би можеле да ја забрзаат екстрадицијата на Љупчо Палевски-Палчо, првоосомничен за убиството на Вања Ѓорчевска и Панче Жежовски.
Сепак, како што вели Џафери во интервју за МИА, во конкретниот случај, неопходна е лична и директна комуникација за да се види што треба дополнително да се направи.
Имено, Лога со делегација в четврток (8 февруари) ќе престојува во Анкара, каде што е предвидено да се сретне со официјални турски претставници, а едно од прашањето за коишто ќе се разговара е екстрадицијата на Палевски, потврдуваат од Правда.
„Па сега не сакам да прејудицирам која, што ќе биде содржината на разговорите таму. Но, во секој случај неопходна е комуникацијата директна и лична таму да се биде, за да се види кои би биле постапките, процедурите, што би требало дополнително, евентуално, да се направи. Затоа е таа лична комуникација и е воспоставена во рамки на меѓународната соработка со соодветните братски институции со коишто соработуваме и со коишто соодветно имаме билатерални спогодби за комуникации“,
вели техничкиот премиер во интервјуто за државната новинска агенција.
Од Министерството за правда за МИА потврдиле дека на 8 февруари Лога ќе престојува во официјална посета на Турција, заедно со претставници на македонските правосудни органи. Во Анкара, заедно со министерот за правда, како што објавија неофицијално дел од медиумите минатата недела, ќе отпатуваат и претседателката на Судскиот совет, Весна Дамева и шефот на Основното јавно обвинителство за гонење на организиран криминал и корупција (ОЈО ГОКК), Ислам Абази. Од двете институции засега нема официјална потврда дека ќе бидат дел од делегацијата предводена од министерот за правда.
Инаку, според Правда, Лога во Анкара ќе се сретне со својот колега, министерот за правда на Турција, Јилмаз Тунч, а предвидени се и средби со претседателот на парламентот на земјата, со претседателите на Уставниот и Врховниот суд, како и со претставници на Академијата за судии и јавни обвинители.
Од Правда велат дека не можат да споделат официјални информации кога Палевски би бил екстрадиран од Турција во земјава. Исто така, не може да се каже ниту колку време осомничениот за двојното убиство може да остане во Турција, бидејќи тоа е прашање за турските власти кои постапуваат согласно нивните закони.
Инаку, доколку и кога Палевски ќе бидат екстрадиран во земјава тој веднаш ќе биде спроведен во казнено-поправна установа, бидејќи веќе му е одреден притвор во рамките на истражната постапка што Основното јавно обвинителство Скопје ја отвори за случајот, кој ја потресе македонската јавност, но и регионот.
Претседателот на државата Стево Пендаровски, неодамна, односно на 9 јануари во интервју за ТВ Сител изјави дека екстрадицијата на Палевски е можно да се случи многу скоро, бидејќи според информацијата која ја добиле истиот ден таа не е спорна од разузнавачки и безбедносен аспект.
Останува уште само, наведе тогаш претседателот, да се договорат деталите за примопредавање, кои се од технички аспект.
Шефот на ОЈО Скопје, Гаврил Бубевски, на брифинг со новинарите минатата недела рече дека во случајот со убиството на Вања и Панче нема нови осомничени лица и не гледа пречка постапката за екстрадиција од Турција на првообвинетиот Љупчо Палевски Палчо да заврши брзо.
Во однос на истрагата, тој на брифингот рече дека предметот е во сериозна фаза.
„Нема нови осомничени лица. Предметот е во фаза на истрага. Правниот дел во делот за екстрадиција е завршен. Останува делот од Турција, за кој што немам последни сознанија. Предметот е веќе во средна, сериозна фаза, можеби за брзо ќе има нешто кога ќе заврши екстрадицијата и не гледам никаква пречка тоа да се заврши брзо“,
рече Бубевски.
Малолетната Вања и велешанецот Панче, кои беа пријавени за исчезнати на 27 и 24 ноември лани, беа пронајдени мртви во близина на Велес и на Скопје на 3 декември.
Според информациите од истрагата кои тогаш на прес-конференција ги изнесоа министерот за внатрешни работи Оливер Спасовски и шефот на скопското Основно јавно обвинителство, Гаврил Бубевски, девојчето било грабнато во влезот од зградата во која живеела, а потоа во вреќа за спиење била ставена во гепек на возило и однесена на локација надвор од Скопје, каде што е убиена.
Убиството на велешанецот, пак, се случило пет дена претходно, односно на 22 ноември. Според информациите што беа досега соопштени, тој бил избран од осомничените поради неговиот автомобил, кој потоа бил користен при грабнувањето на Вања.
На 22 декември од Основното јавно обвинителство соопштија дека ги добиле обдукциските наоди од Институтот за судска медицина, за кои рекоа дека нема да бидат објавени во јавност.
Покрај Палевски, кој е првоосомничен, за грабнувањето и убиството на Вања Ѓорчевска и Панче Жежовски осомничени се и Велибор Манев, Влатко Кешишов и Боре Видевски. Тие се товарат за по две кривични дела – убиство и грабнување.
Во случајот е осомничен и таткото на Вања, Александар Ѓорчевски, кого истрагата го сомничи дека им помогнал на другите да го грабнат девојчето и се товари за кривичното дело грабнување.
На сите четворица Основниот кривичен суд во Скопје и определи притвор, а идентична мерка за обезбедување на присуство му беше одредена и на Стефан Димовски, осомничен за помагање на сторител во извршување на кривично дело, бидејќи го возел првоосомничениот Палевски од Србија до Турција.