За иницијативата за референдум на Левица рече дека сè уште не е доставена до Собранието
Претседателот на Собранието Талат Џафери вели дека нема комуникација со опозицијата. Координаторот на пратеничката група на ВМРО-ДПМНЕ не доаѓа на редовните средби во понеделник, а немаат веќе ниту неформални средби бидејќи тие се злоупотребувале.
За пленарната седница за одлуките за продолжување на кризната состојба, Џафери рече дека ќе биде закажана утре и додаде дека за одлуките треба да се гласа најдоцна до полноќ.
На денешната средба со новинарите за тековните и идните активности на Собранието, Џафери исто така забележа и дека неколку комисии одржуваат расправи по десетина продолженија само за по неколку точки на дневниот ред. Тука ја посочи Комисијата за избори и именувања која одржала 12 расправи за една точка, а само на едно од продолженијата биле потпишани за присутни 58 пратеници за што им следуваат патни трошоци.
За иницијативата за референдум на Левица рече дека сè уште не е доставена до Собранието.