Лидерот на ВМРО-ДПМНЕ вчера најави дека сериозно размислува да се формираат неколку пратенички групи и партијата така да настапува во Собранието, наместо со една пратеничка група составена од 44 пратеници
На забелешка дека секоја партија кога е во опозиција ги користи сите механизми за политичко дејствување, Џафери рече: „Не знам, јас никогаш не сум бил во опозиција“
Претседателот на Собранието Талат Џафери изјави денеска дека нема основа пратеничката група на ВМРО-ДПМНЕ да се подели во неколку табори, со посебни координатори, како што вчера најави партискиот лидер Христијан Мицкоски.
Џафери не даде прецизен одговор зошто смета дека нема основа за формирање неколку пратенички групи, кога за тоа се потребни најмалку пет пратеници, а коалицијата на ВМРО-ДПМНЕ брои 44 члена во Собранието. Спикерот рече дека политичката клима сега е поинаква во споредба со атмосферата во 2017 година, кога тогашното раководство на ВМРО-ДПМНЕ реши да формира 10 пратенички групи.
„Вчера одбележавме 4 години од настаните на 27 април и сметам дека веќе ги оставивме зад нас таквите методи на дејствување. Тогаш политичката клима беше поинаква и оставивме простор и за такво дејствување, сега климата е поинаква“,
рече Џафери.
Во претходниот собраниски состав ВМРО-ДПМНЕ не го признаваше легитимитетот на Џафери, по неговиот прв избор на чело на парламентот на 27 април 2017 година.
За разлика од тогаш, ВМРО-ДПМНЕ сега учествува на координациите кај Џафери, кој, пак, од друга страна има проблем да обезбеди кворум во пленарната сала поради неприсуство на пратеници од опозицијата.
Дури 28 закони се под амандманска блокада
Џафери на денешниот редовен брифинг со новинарите посочи дека моментно 28 закони се блокирани со амандмани, поднесени од опозицијата. Претходно, под амандманска блокада биле 37 закони, ама 9 од нив биле повлечени од процедура во меѓувреме. Најмногу амандмани – 2 697 има поднесено Алијанса/Алтернатива на законот за ревизија на инструментот за претпристапна помош ИПА.
Потоа е законот за новиот Клинички центар, за кој ВМРО-ДПМНЕ има поднесено 2 029 амандмани. Џафери потсети на членот 29 од Деловникот, според кој пратениците имаат право и обврска да присуствуваат на седниците на Собранието.
Рече дека направил анализа за тоа колку седници одржало Собранието од почетокот на оваа година и колку пратеници се евидентирани како присутни секој ден, што е и основа за подигнување надомест за патни трошоци, а потоа не присуствувале на седницата. Како пример ги наведе седниците во јануари, кога како присутни се евидентирани од 96 до 110 пратеници, но, и покрај тоа, во салата најчесто немало ни 61 пратник, за да има кворум.
На забелешка дека секоја партија кога е во опозиција ги користи сите механизми за политичко дејствување, Џафери рече: „Не знам, јас никогаш не сум бил во опозиција“.
Тој посочи дека неговата партија од формирањето во 2002 година е на власт, со исклучок на периодот од 2006 до 2007, кога, како што рече, не влезе во Владата, иако победи на избори.