Џафери: Гласањето за уставните измени може да се одложи, а може и да не се случи

Претседателот на Собранието, Талат Џафери објаснува дека дебатата за уставните измени почнува на 18 август, а завршува на 31 август. Ако нема двотретинско мнозинство, гласањето може да биде одложено, но и воопшто да не се случи, со што постапката за уставни измени завршува

Сепак, тој повикува – „да мислиме за иднината и за идните генерации, да им оставиме барем растеретен и отворен пат“

Седницата за уставни измени почнува на 18 август, а дебатата треба да заврши на 31 август, но претседателот на Собранието, Талат Џафери, во интевју за МИА вели дека ако нема двотретинско мнозинство, гласањето може да биде одложено, а ако нема услови, може воопшто и да не се случи, со што постапката за уставни измени завршува.

„Седницата на 18 август ќе се отвори и ќе се усвои дневниот ред како што е постапката, затоа е потребно присуството од 61 пратеник, а за гласање минимум една третина од вкупниот број. Тоа е општ принцип и секако се отвора дискусија, дебата, се повикува според процедурата да се отвори дебата. Што ќе биде, како ќе биде, не можам да кажам сега оти не можам да предвидам. Но, обврска ми е да имам испланирано десет работни дена да може да работи Собранието доколку има пријавено за збор за толку, значи максимумот за да трае дебатата е десет дена. Десеттиот ден завршува дебатата без оглед дали останале уште говорници или не“,  

појаснува Џафери.

Џафери не одговари директно до кога може да се одложува гласањето во првата фаза, односно за утврдување на потребата за носење уставни измени.  

Навраќајќи се на искуството од 2008 година кога требаше да станеме членка на НАТО, вели дека „не мора да ги повториме грешките“. Историски, додава тој, се преземени многу одлуки за кои во времето на одлучување имало спорни мислења.

„Еве, во предвечерие сме на Илинденско востание, така? Донесена е одлука – ќе се оди во вооружено дејствие. Мислите сите беа едногласни во таа одлука? Не. Но, од перспектива, 120 години се има држава за којашто првичната одлука, со сиот ризик, не политички, туку физички ризик, така, но имале доблест затоа што мислеле за иднината, а не мислеле за својот статус. И ние овде што побрзо се освестиме и да мислиме за иднината и за тие идни генерации коишто ќе наследат работа овде, да им оставиме барем растеретен отворен пат по којшто ќе можат да се развиваат и да си одат понатаму“,

потенцира Џафери. 

(ФОТО) Министрите од ДУИ ги потпишаа оставките и порачаа: Европската иднина пред сѐ

Мицкоски: Со уставните измени власта се обидува да протурка дводомен парламент