Претседателот на Собранието, Талат Џафери, е против одложување на пописот и смета дека неговото спроведување нема да предизвика штета од аспект на ситуацијата со ковид-19.
Своите ставови, тој ги изнесе во емисијата „Клик Плус“ на ТВ21.
„Јас сум против одложување на пописот. Ние сме имале избори сред пандемија. Пописот е индивидуален акт, попишувачот оди кај семејството и согласно протоколите прави регистрација, односно попис. Ова е мое мислење и сметам дека нема потреба да се одложи. Сепак, ќе има процедура за ова и ќе видиме како ќе помине. Повикувам на почитување на Закон и на Устав, не е важно дали јас сакам или не“,
рече Џафери.
Договор за одложување на пописот падна денеска на средбата помеѓу лидерите на СДСМ и ВМРО-ДПМНЕ, Зоран Заев и Христијан Мицкоски. Двајцата се согласија пописот на резидентното население наместо од 1 до 21 април, да се спроведе од 5 до 30 септември годинава.
Во меѓувреме, ќе тече самопопишувањето на дијаспората, односно македонските државјани во странство ќе може да се попишуваат до крајот на септември, со оглед на тоа што овој процес е веќе почнат.
Џафери, според изјавите на Заев, бил консултиран од страна на премиерот. Исто така, Заев се консултирал и со претседателот Стево Пендаровски, министерот за правда, Бојан Маричиќ, и директорот на Државниот завод за статистика, Апостол Симовски, но и со најголемите коалициски партнери, ДУИ и Беса.