Претседателот на македонското Собрание се обрати на конференцијата на претседатели на парламенти на Европската Унија, која се се одржува на Брдо кај Крањ, посочувајќи дека проширувањето треба да продолжи со поголема динамика и конечно да почнат преговорите со Северна Македонија и Албанија
Со апел за „што поскора адаптација на европскиот наратив за проширувањето, со оглед на драстичната актуелна промена на европското безбедносно, економско и енергетско милје и долгорочните последици што ќе ги има врз нашиот континент“, го заврши претпладнево претседателот на македонскиот парламент Талат Џафери своето обраќање на конференцијата на претседатели на парламенти на Европската Унија, која се се одржува на Брдо кај Крањ.
„Време е вашата визија за иднината на Европа да се преточи во дела. Процесот на проширување да продолжи со поголема динамика и конечно да почнат преговорите за членство на Северна Македонија и Албанија – во најскоро време“,
истакна Џафери.
Џафери втор ден учествува на конференцијата, чија тема е „Европската Унија како гарант за стабилноста, безбедноста и напредокот на регионот (и пошироко)“, во организација на Националното собрание на Словенија, во рамки на претходното словенечко претседателство со Советот на ЕУ. На конференцијата учествуваат претседателите на парламентите на земјите членки на ЕУ, на земјите кандидати и партнери на Европскиот парламент.
Според Џафери, стабилноста, безбедноста и просперитетот на Северна Македонија во изминатите децении, во голема мерка се должат на неизмерната поддршка по разни основи од страна на Европската Унија и нашите меѓународни партнери. Во тој контекст тој издвои четири клучни моменти од нашата заедничка историја со Унијата:
„Првиот момент е воспоставувањето на дипломатските односи во 1995 година, со што се отворија можностите за договорна соработка во повеќе области од заемен интерес, особено соработката која се одвива преку Договорот за стабилизација и асоцијација. Вториот момент е вашиот придонес за Охридскиот рамковен договор во 2001 година, со кој денес го славиме соживотот во нашата држава и моментот со кој ја избегнавме судбината која ја искусија поголемиот дел од нашите соседи во регионот. Третиот момент е поврзан со вашата директна вклученост во надминувањето на најголемата политичка криза во нашата земја во 2015 година и напорите кои ги вложивте за ние повторно да се вратиме на нашиот интеграциски пат. И четвртиот момент е вашата поткрепа за надминување на отворените прашања со Грција и Бугарија, како дел од предусловите за наше отпочнување на преговорите за членство со Унијата“,
рече Џафери.
Ја поздравуваме, како што рече, повеќедецениската соработка со Европскиот парламент, особено во рамките на дијалогот „Жан Моне“, кој значително придонесува за унапредување на политичкиот дијалог во нашето Собрание.
„Целта на оваа моја ретроспектива беше да ја потврдам неспорната улога на Европската Унија за она што е Северна Македонија денес: Функционална демократија, земја која служи како пример за мултикултурализам, мултиконфесионалност и мултиетничност во регионот и пошироко, земја која на мирољубив начин ги разрешува отворените прашања со соседите и земја која вложи максимални напори да ги исполни комплексните реформи и критериуми за отпочнување на преговори за членство во Европската Унија“,
рече Џафери.
Џафери потсети дека ние сме посветен партнер на ЕУ, кој активно придонесува за нејзината безбедност и стабилност, особено во моменти на наплив на бегалци, како што беше кризата во 2015 година.
„Сегашните тектонски поместувања во безбедносната сфера одат во прилог на унапредување на отпорноста на ЕУ и потребата за зајакнување на партнерствата со земјите кандидати. Во тој контекст, ја поздравуваме иницијативата за целосна интеграција на земјите од Западен Балкан во Стратешкиот компас и можноста за пристап до Европскиот одбранбен фонд, бидејќи сме убедени дека нашата вклученост ќе има директна рефлексија на мирот и безбедност во нашиот регион, а индиректно на мирот и безбедноста на целиот континент“,
рече Џафери.
На маргините на конференцијата, како што е најавено, претседателот на Собранието Џафери ќе оствари билатерална средба со потпретседателката на Националното собрание на Француската Република, Лаетита Сен-Пол.
Џафери, вчера, имаше средби со претседателот на Националното собрание на Словенија, Игор Зорчич и со претседателот на Народното собрание на Република Бугарија, Никола Минчев.