За 49,1 отсто од граѓаните домашниот буџет не е доволен за да си покријат основните месечни трошоци за живот. Кај повеќе од 80 отсто во текот на изминатата година трошоците биле зголеми, а повеќе од половина сметаат дека мерките на Владата не даваат резултат
Мнозинството граѓани во земјава или 57,9 отсто сметаа дека државата не е подготвена да се справи со енергетската криза, а 32,6 отсто се на ставот дека е подготвена, покажува анкетата која ја изработи Институтот за политички истражувања (ИПИ) за потребите на емисија „Детектор“ на Сител ТВ.
Резултатите покажуваат дека има поделеност околу ова прашање помеѓу Македонците и Албанците. 47 отсто од Албанците опфатени во анкетата сметаат дека државата е подготвена, а 44,4 отсто дена не е. Од Македонците, пак, само 28,5 отсто се на став дека сме подготвени, а 61,5 отсто се со спротивно мислење.
„Сепак, мнозинството граѓани или 51,1 отсто од анкетираните очекуваат земјава да има доволно енергенси за да ја помине зимата, наспроти 35,3 отсто кои стравуваат дека енергенси нема да има“,
објави Сител ТВ.
Во однос на тоа како се справува земјава со недостигот на енергенси во споредба со земјите регионот, 51,2 отсто се на став дека тоа го прави полошо. Разлика не гледаат 30,4 отсто, а 7,5 отсто од анкетираните сметаа дека Македонија подоборо се справува од земјите од регионот.
На речиси половина од граѓаните месечниот буџет не им е доволен за основните потреби
Истражувањето на ИПИ и „Детектор“ опфатило и прашања во однос на трошоците на населението, па така на прашањето „Дали вашиот домашен буџет може да ги покрие основните месечни трошоци за живот во моментов“, речиси половина или 49,1 отсто од анкетираните одговориле „не“, а со „да“ одговориле 48 отсто.
Кај повеќе од 80 отсто од граѓаните трошоците во текот на минатата година биле зголемени.
„54,4 отсто велат дека имале многу зголемени трошоци а 28,3 отсто донекаде зголемени. Без поголеми промени велат дека поминале 13,4 отсто од анкетираните, 1,5 отсто велат дека имале донекаде намалени трошоци а многу големо намалување на почувствувал никој“,
објави Сител ТВ.
За мерките за штедење, пак, кои ги воведе Владата, 55,4 отсто сметаат дека не даваат резултати, а 37,6 отсто сметаат дека имаат ефект.
Анкетата ИПИ ја спровел телефонски, на репрезентативен примерок од 1 119 испитаници во периодот од 23 до 26 декември 2022 година.
Бектеши очекува цените да паѓаат, ВМРО-ДПМНЕ вели дека власта требало да произведува повеќе струја за сега да имаме пониски цени
Ваквите резултати и своите ставови во емисијата ги спротивставија власта и опозицијата. Од една страна, министерот за економија Крешник Бектеши, рече дека ситуацијата со кризата се стабилизира, цените на енергенсите се намалуваат и оттука очекува намалување на трошоците и за прехранбените производи.
Во однос на производството на струја, пак, посочи дека по долги гони целиот енергетски капацитет во државата работи во полн капацитет за производство и снабдување со електрична енергија.
„Ситуацијата веќе е стабилизирана. Веќе е намалена цената на електричната енергија за домаќинствата и малите потрошувачи. За среќа цената се намалува и на берзите. Се надевам дека дополнително намалување на цената на струјата РКЕ ќе донесе и во јуни бидејќи произведуваме повеќе. Сите капацитети се во функција и тоа се забележува и кај довербата на граѓаните дека државата нема да има проблем во делот на енергенсите. Но нема да има проблем ни во делот на цените. Нема да има зголемување на цените на енергенсите, вклучувајќи ја и струјата. Тие ќе се намалуваат, убедени сме дека тоа ќе влијае на намалување на цените на основните прехранбени производи“,
рече Бектеши во емисијата „Детектор“.
Владо Талевски од Комисијата за енергетика на ВМРО-ДПМНЕ, пак, рече дека за да се намалат цените најдобро ќе било државата да произведувала електрична енергија, но ЕСМ тоа не го правела.
„2021 е најкатастрофална година во производство на енергија за ЕСМ. Во 2019, во нивното владеење, ЕСМ произвело 4 250 гигават часови, во 2020 има пад 3 642 гигават, во 2021 година, 3 170 гигавати вкупно произвела ЕСМ со сите капацитети и хидро капацитетите. Овде се случи еколошка катастрофа на хидроелектраните. РЕК Битола произведе неверојатно црни 1 900 гигават часови. Во РЕК Битола има три турбини по 230 мегавати. РЕК просечно годишно работел со 200 мегавати на мрежа. Значи тоа е помалку од 100 отсто на еден блок. Значи РЕК Битола работел со само 27 отсто на мрежа од инсталираниот капацитет“,
рече Талевски.