Министерката за правда Рената Дескоска изјави дека сè уште не се целосно разгледани и анализирани забелешките на Венецијанската комисија за Законот за употреба на јазиците и дека тоа најверојатно заврши по изборите.
„Тој процес не е завршен. Се разгледуваат и се анализираат забелешките и законскиот текст и јас искрено не верувам дека тоа би се завршило пред изборите бидејќи, сепак, треба да се направи сериозна анализа на она што е предложено – дали тоа значи промена на закон, дали тоа значи создавање одредени услови. Така што, тоа најверојатно ќе остане за по изборите“,
изјави Дескоска по промоцијата на иницијативата „Отворено судство“ која е дел од програмата „Подобрување на транспарентноста, правната сигурност и ефикасноста на судството во Северна Македонија“.
Венецијанската комисија во декември ги повика властите во земјава да го преиспитаат Законот за употреба на јазиците преку консултации со сите засегнати страни.
Правните експерти на Советот на Европа подвлекуваат дека, во споредба со законот од 2008 година, новиот закон значително ја проширува употребата на албанскиот јазик и во многу аспекти ги надминува европските стандарди утврдени со Рамковната конвенција за заштита на националните малцинства и Европската повелба за регионални и малцински јазици, се наведува во соопштението.
Венецијанската комисија ја поздравува подготвеноста на властите за подобрување на јазичната состојба на заедниците. Оценува дека во одредени области новиот закон може да оди премногу далеку со наметнување на јавните институции на нереални правни обврски, особено во врска со употребата на албанскиот јазик во судска постапка, придружено со тешки санкции во случај на непочитување и можност за промена на судските решенија, доколку има недостиг на превод и толкување во текот на постапката.
Според мислењето на Венецијанската комисија, овој пристап би можел значително да го забави функционирањето на целото правосудство, ризикувајќи сериозни нарушувања на правото на фер судење, кое е загарантирано со Европската конвенција за човекови права.
Комисијата понатаму забележува дека Законот за јазиците не е прецизен кои одредби важат само за албанскиот, а кои и за другите јазици на заедниците.
Владата во повеќе наврати и преку повеќе претставници истакна дека ќе ги почитува препораките преку создавање капацитети, со цел имплементирањето на двојазичноста да не создава проблеми во општеството.
Законот за употреба на јазиците беше донесен во јануари минатата годинава. Собранието го гласаше по вторпат, откако претходната година претседателот Ѓорге Иванов одби да го потпише указот.