Лидерот на Демократскиот сојуз на Косово (ЛДК), Иса Мустафа, свика седница на партиското претседателство, на која треба да се избере кандидат за формирање нова влада во Косово.
Претседателот на Косово, Хашим Тачи, вчера ги повика косовските парламентарни партии на консултации во врска со формирањето нова влада откако пред еден месец Собранието му изгласа недоверба на кабинетот воден од лидерот на Движењето самоопределување (ВВ) Албин Курти, кој беше во коалиција токму со Мустафа.
Со оглед дека Курти и ВВ, како партија победничка на изборите од октомври минатата година, не одговорија на повторените барања да именуваат кандидат за мандатар, Тачи објави дека мандатот ќе му го додели на оној парламентарен субјект кој ќе го обезбеди потребното мнозинство за да формира влада.
ЛДК на Мустафа веќе оствари разговори со опозициските Алијанса за иднината на Косово (ААК) на Рамуш Харадинај, кој беше премиер пред да Курти да победи и да формира влада, и Социјалдемократската иницијатива (Нисма) на Фатмир Лимај. Како што посочија од партијата на Мустава, сега заедно со овие две и со партиите на немнозинските етнички заедници, може да ја формира идната влада.
Партискиот лидер Мустафа изјави дека нема да прифати да биде нов мандатар, а како идни премиери се споменуваат имињата на членовите на раководството на ЛДК, Авдулах Хоти, Љутфи Хазири и Кујтим Шаља.
Седницата на претседателството на ЛДК, на која не присуствува партиската потпретседателка, парламентарната спикерка Вјоса Османи, која од самиот почеток се противи на уривањето на владата на Курти, се одржува во централното партиско седиште во Приштина.
Се очекува дека претседателот ќе му го додели мандатот на ЛДК за формирања нова влада во текот на денешниот ден.
Курти, пак, тврди дека нова влада во ваква ситуација може да се формира единствено по вонредни парламентарни избори, кои треба да се одржат откако ќе помине епидемијата на ковид-19. Тој синоќа најави дека доделувањето на мандатот на друга партија ќе го оспори пред Уставниот суд на Косово.