Јас верувам во сопствениот капацитет, во ставовите кои ги застапувам и верувам дека граѓаните знаат да препознаат кога нешто е вистинито и чесно и искрено – вели лидерката на Нова алтернатива и градоначалничка на Скопје за одлуката да не прават предизборна коалиција со други политички субјекти
Партијата Нова алтернатива (НА), чија лидерка од неодамна е градоначалничката на Скопје, Данела Арсовска, ќе настапи самостојно на парламентарните избори. Во интервју за „360 степени“ на МРТ 1 , таа вели дека верува во сопствениот и во капацитетот на партијата, со која ќе имаат кандидатски листи во сите шест изборни единици. Арсовска останува на ставот дека таа ќе ја предводи листата на НА во Изборна единица 1 (Скопје, н.з.), но не ги открива останатите носители со образложение дека се прават партиски калкулации.
„Доколку се сеќааваат сите што се случуваше на минатите избори во 2021 г. на локалните избори на коишто победив, јас имав голема бројка од околу 50 илјади гласови повеќе од сите 45 советници кои беа на листата од оние што ме поддржаа. А од мојот противник имав 30 илјади гласа повеќе. Така што, јас верувам во сопствениот капацитет, во ставовите кои ги застапувам и верувам дека граѓаните знаат да препознаат кога нешто е вистинито и чесно и искрено“,
рече Арсовска.
Прашана зошто се одлучи да преземе постоечка политичка партија, наместо да фомира нова, за што се зборуваше во медиумите, Арсовска одговори дека станувало збор за шпекулација произлезена од „политичките кујни“.
Арсовска: Раководството на партијата ме покани, разговаравме, затоа што знаеја дека имам аспирации да почнам нешто во политиката. Дискутиравме на сите теми, најдовме заеднички постулати за кои се обединуваме и одлучив да ја прифатам нивната покана и да продолжиме со Нова алтернатива на следните избори.
360 степени: Немаше ли да биде подобро да покажете дека имате капацитет да соберете илјада потписи, илјада пристапници за да фомирате нова партија наместо сега да ги слушате муабетите дека Миле Зечевиќ ви купил партија? Не сум веројатно прв кој ви го кажува ова.
Арсовска: Не знам, доколку стоите позади ова, ќе треба да се видиме на суд. Не знам од кои извори ги наоѓате овие информации, меѓутоа би требало добро да проверувате што е она што се говори, кои се овие лаги и манипулации и кои се оние кои ги презентираат во јавноста. За да кажете нешто, треба да стоите позади тоа за да го докажете.
Арсовска очекува дека Нова алтернатива ќе стане парламентарна партија, но не прецизира колку мандати би освоиле на изборите.
„Јас го гледам расположението на граѓаните, особено на она тивко мнозинство кое е разочарано од сето она што се случува во Македонија изминатите триесет години. Имате над 65 % од нашите граѓани кои повеќе не веруваат никому. И тоа може да го видите на сите анкети. Тоа е најголемата партија во Макеоднија, партијата којашто не е задоволна од сето она што ни се случува досега. И затоа сметам дека треба да се даде поддршка и да се дозволи сите нови кои имаат можност да докажат нешто, а немаат дамки од претходно, дека можат да го направат истото и дека нема граѓаните да ги излажат за она кое го застапуваат“,
вели претседателката на Нова алтернатива.