На прашањето дали ако дисциплинската комисија, чиј член е, констатира тешка повреда и предложи разрешување на обвинителката Ивана Трајчева, тоа може да биде разбрано како „’награда’ за тоа што се одважила да гони висок функционер на актуелната власт“, шефот на вишото скопско обвинителство Мустафа Хајрулахи рече дека не сака да прејудицира исход на процедура што е во тек и дека не секоја постапка завршила со разрешување обвинител
Вилма Рускоска, Ивана Трајчева и Елизабета Јосифовска – трите обвинителки од ОЈО за гонење на организиран криминал и корупција, за кои државниот обвинител Љубомир Јовески уште во август иницираше дисциплински постапки, се уште не се повикани да дадат своја одбрана пред дисциплинската комисија. В.д. шефот на вишото скопско обвинителство, Мустафа Хајрулахи, кој и самиот по функција е член на дисциплинската комисија, во емисијата „360 степени“ на ТВ Алсат, рече дека одлука на комисијата ќе следува откако ќе се слушне одбраната на обвинителките. Ако комисијата утврди тешка повреда, обвинителите може да се соочат со предлог за разрешување или со поголема парична казна, рече Хајрулахи.
Хајрулахи: Постапката е како кривичната, јавните обвинители треба да дојдат и да дадат своја одбрана. Имаме известител по предметот и се надевам дека во скоро време ќе бидат повикани за да дадат своја одбрана. Откако ќе ги дадат нивните одбрани, ние ќе мораме во законски предвидениот рок, не се сеќавам колку е рокот, да донесеме одлука во однос на дисциплинската постапка – дали има или нема повреда и тоа се става на гласање и од сите пет члена на комисијата се носи одлука.
360 степени: Што може да биде епилогот од одлуката на дисциплинската комисија?
Хајрулахи: Не сакам да прејудицирам, ќе кажам за други постапки што се веќе завршени. Имавме во последните четири години неколку дисциплински постапки, од кои две завршија со разрешување на јавен обвинител, едниот од Охрид, другиот беше од Тетово. Утврдивме тешка дисциплинска повреда, предлогот едногласно беше за разрешување и Советот на јавни пбвинители тоа го констатираше. Другите санкции може да бидат парична казна и во случај ако е тежок престап, односно тешка дисциплинска постапка, паричните казни се повисоки.
Една од обвинителките што се соочија со дисциплинска постапка поради претресот во Финансиската полиција, Ивана Трајчева, ја водеше истрагата и сега го застапува обвинението за екс-генералниот секретар на Владата, Драги Рашковски. Па, на прашањето дали ако комисијата констатира тешка повреда и предложи нејзино разрешување, тоа може да биде разбрано како „’награда’ за тоа што се одважила да гони висок функционер на актуелната власт“, Хајрулахи рече дека секоја постапка не завршила со разрешување обвинител.
„Не, не сакам да прејудицирам исход на постапка која не знам како ќе заврши. Но, не мора да значи дека ако има постапка, таа мора да заврши со дисциплинска мерка. Може и да се запре постапката. Беспредметно би било јас како обвинител, како член на таа комисија, да прејудицирам исход на постапка. Но, ќе ви кажам друга ситуација, во однос на претставките од странките, наидуваме на претставки каде што навистина има основа да се провери работата на јавен обвинител. Во 2021 г. за четворица јавни обвинители од Основното јавно обвинителство Скопје поведов тешка дисциплинска постапка. Двајца завршија со парични казни, а против другите двајца, постапката беше прекината“,
вели Хајрулахи.
Тој додаде и дека двете страни имаат право на жалба по одлуката на комисијата. Дисциплинската комисија е составена од пет члена – шефовите на четирите вишите обвинителства (Скопје, Гостивар, Битола и Штип), како и еден претставник од републичкото обвинителство.
Јавното обвинителство на 16 август соопшти дека е поведена дисциплинска постапка за тројца обвинители за кои „постои сомнение дека намерно и неоправдано направиле крупна професионална грешка со што сториле тешка дисциплинска повреда од член 91 алинеја 6 од Законот за јавното обвинителство“.
Постапките следуваа непосредно по претресот во Управата за финансиска полиција и јавните препукувања меѓу тогашниот директор на Финансиската полиција, Арафат Муареми, и шефицата на ОЈО ГОКК, Вилма Русковска.