„Кај оние пациенти што имаат изгореници од прв степен не ни треба ништо друго освен маска. А кај тие што се на интензивна нега има посебни правила, како кај нас така и во странство. Таму и да сакаме не можеме да влеземе без да бидеме облечени според протоколите“, вели министерот за здравство
Како Влада се придржуваме на протоколите при посетата на пациентите во болниците. Затоа не би сакал да ги политизираме овие моменти, рече денеска министерот за здравство Арбен Таравари одговарајќи на новинарско прашање поврзано со посетата на српскиот претседател Александар Вучиќ на македонските пациенти од пожарот во Кочани, кои се хоспитализирани на Воено-медицинската академија (ВМА) во Белград.
„За мене, како министер за здравство, пред сè и над сè, во овој момент, ми е важно пациентите да се живи и здрави. Уште пред неколку денови апелирав дека не треба да се злоупотребуваат лицата на пациентите“,
рече тој.
Посочи дека тој како министер за здравство и премиерот Христијан Мицкоски имаат обврска да ги посетат пациентите, но тие што се со полесни повреди.
„Кај оние пациенти што имаат изгореници од прв степен не ни треба ништо друго освен маска. А кај тие што се на интензивна нега има посебни правила, како кај нас така и во странство. Таму и да сакаме не можеме да влеземе без да бидеме облечени според протоколите“,
објасни Таравари.
На прашањето според кои протоколи вчера ги посетиле пациентите во Бугарија, со оглед дека најголем дел од нив се на механичка вентилација, Таравари рече дека секаде каде што извршил посета на пациенти бил облечен во согласност со болничките протоколи.
„Секаде каде што бевме, а и тука кога ги посетував пациентите во ‘8 Септември’ и во Градската болница бев облечен како што треба. Но, не заборавајте дека имаме и лесни пациенти, кои имаат изгореници од прв степен и со фрактури, а нив можеме и само со маска да ги видиме“,
кажа министерот.
Премиерот Христијан Мицкоски вчера рече дека посетите на повредените од пожарот во Кочани не ги прави поради пиар-цели.
„Го правам тоа за да излезам пред вас, да не се кријам и да зборувам отворено за сè она со кое се соочуваме и сето она по кое постапуваме,
изјави денеска премиерот Христијан Мицкоски по посетата на повредените од пожарот во Кочани кои се хоспитализирани во Градската општа болница „8 Септември“ во Скопје.
Српскиот претседател пред два дена објави низа фотографии од посетата на повредените од пожарот во Кочани кои се на лекување во Белград. Во болниците каде што се сместени, Вучиќ отиде со десетина новинарски екипи кои ги фотографираа тешко повредените пациенти.
Српските доктори ја критикуваат посетата на Вучиќ како неовластена, во просторија каде што се наоѓаат пациенти кои имаат тешки изгореници и оти секаков контакт со такви пациенти би требало да биде рестриктивен, бидејќи се подложни на сериозни инфекции.