За вакцинација на деца може да зборуваме кога ќе имаме 75-80 отсто вакцинирано население. Во моментов приоритет треба да се возрасните и ранливите категории на граѓани, а децата ќе стекнат имунитет по природен пат, вели Пановски по најавата дека од понеделник ќе може да се вакцинираат деца од 12 до 16 години
Главен фокус на вакцинацијата во моментов треба да се возрасните и ранливите групи на граѓани, а не децата, смета микробиологот д-р Никола Пановски, коментирајќи ги најавите од Министерството за здравство дека од понеделник ќе се дозволи вакцинација на деца од 12 до 16 години со вакцината „Фајзер“.
Пановски во изјава за „360 степени“ вели дека со моменталната опфатеност на вакцинација на населението, не може да се зборува за вакцинација на малолетници.
„Мислам дека прво треба да се вакцинираат луѓето над 60 години. Не знам зошто би се вакцинирале децата, мислам дека целата работа е некако наопачки. Вакцинирањето е доброволно и пак ќе си ги вакцинираат децата оние што веќе се вакцинирани и нема да се заштитат фамилиите каде никој не е вакциниран. Не знам, може е само најава, но очигледно има потреба да се вакцинираат ранливите, ризичните групи на граѓани. Не е во ред да се заштитутваат тие луѓе со тоа што ќе ја вакцинираме нивната околина и тоа децата кои лесно го поминуваат вирусот. На 17 отсто проценти вакцинирани граѓани да се зборува за вакцинирање на деца, тоа не ми е логично. Тоа може да се зборува кога ќе имаме 75-80 отсто вакцинирано население“,
вели Пановски.
Според него, околу 70 отсто од децата досега се природно имунизирани и засега, не би препорачал нивна вакцинација.
„Грипот е поопасен за децата од ковид, па дури и од делта сојот. Не е опасен, но ако веќе ги споредуваме е поопасен, а не ги вакцинираме од грип. Кога ќе се заврши со вакцинација на полнолетните ќе зборуваме за полнолетните граѓани, ние сега сме далеку од тоа. Тогаш би размислувал, но сега не знам зошто би размислувал за вакцинација на деца. Сметам дека децата во школо ќе стекнат имунитет по природен пат“,
вели Пановски.