Се работи за летала со високи технички можности кои можат да ја скенираат цела територија на државата и да укажат за сите прекршувања, вели министерот за внатрешни работи
Моментно, на територијата на целата држава има 1.105 решенија за здравствен надзор за изолација , додека бројката на решенија за самоизолација порасна на 8709. Досега 89 лица не ги почитувале овие мерки за заштита од ширење на коронавирусот, за што се поднесени 113 кривични пријави, информира министерот за внатрешни работи Наќе Чулев, во гостување на Телма.
Тој рече дека МВР спроведува контроли на два начина во однос на движењето на граѓаните, согласно генералниот план и плановите доставени до секторите за внатрешни работи – преку пунктови што се поставени на главните сообраќајници, главно со цел контрола на движењето на патничките возила и преку мобилните патроли. На територија на целата држава, како што информира Чулев, има 156 пунктови на влезовите на населените места и на главните сообраќајници, а има и постојани мобилни патроли по улиците на населените места.
„Во наредниот период планираме да ја воведеме и единицата за беспилотни летала која практично не е во функција. Затоа ќе поднесам соодветен акт за систематизација до владата со цел повторно ставање во функција на оваа единица. Се работи за беспилотни летала со високи технички можности кои буквално можат да ја скенираат цела територија на државата и да ни укажат за сите прекршувања и така да имаме мапа каде се најчестите прекршувања. Има големи можности, буквално можат и регистрацијата да ја видат. Леталата се во функционална состојба имаме платено и нивно одржување, тука се и операторите на овие беспилотни летала, се што треба е само во функција да се стави единицата“,
додаде Чулев.
Министерството за внатрешни работи, како што нагласи Чулев, најостро ќе постапи против сите оние кои ќе објават на социјалните мрежи лажни вести и кои ќе предизвикаат вознемиреност и паника кај граѓаните. За таа цел, додаде тој, Одделот за компјутерски криминал и дигитална форензика презема континуирани активности преку следење на профилите и активности на социјалните мрежи.
„Досега МВР има поднесено осум соодветни известувања до ОЈО, а за две уште се чека одговор од фејсбук и од твитер. Се работи најчесто за случаи каде се изнесуваат погрешни или лажни инфромации за луѓе заболени од коронавирусот. Ги предупредувам граѓаните и ги повикувам да се воздржат од објавување вакви лажни вести, затоа што тоа е крајно неодговорно и несовесно однесување во ситуации кога сите граѓани и сите државни институции преземаат максимални активности во справување со последиците од коронавирусот“,
рече Чулев.