„Сведени сме на 15 доктори, а процентот на старост е над 50 години. Ни требаат млади, свежи кадри, кои можеме да ги обучиме. Некој треба да продолжи да работи и да ја држи институцијата на ниво“, вели Чибишев
Според него, 18-те лица што работеле на Клиниката биле манипулурани со лажни ветувања дека ќе бидат вработени и тие незаконски престојувале во институцијата со невалидни договори, а што е уште потрагично, како што рече директорот, добивале и плата со што буџетот на Клиниката е оштетен за речиси 650 000 денари
На Клиниката за токсикологија повеќе нема да работат осумнаесетте лица со истечени договори, а вчера новиот директор Андон Чибишев им рекол дека повеќе не треба да доаѓаат на работа.
Новиот директор на Клиниката, Чибишев, најави дека повеќе нема да има каубојски вработувања на Токсикологија.
Чибишев, како што рече на денешната прес-конференција, откако бил назначен на функцијата, извршил проверки и скенирања на работата на Клиниката на сите области, и неговата оценка е дека во изминатиот период Токсикологија била доведена во ситуација на организациски и кадровски колапс, што во овој период уште повеќе ја отежнува состојбата бидејќи е време на годишни одмори.
„Најголем проблем ни е кадровската екипираност за да одговориме на предизвиците. Во изминатиот период тука имавме вработено 18 лица, кои работеа неколку месеци со истечени договори. Тоа внесуваше немир и конфликти меѓу вработените. Се даваа информации дека имаат договори за вработување благодарение на добиена согласност од Министерство за финансии, но таква согласност не постои“,
рече Чибишев.
Тој рече дека на Клиниката има документ од април 2024, во кој пишува дека Министерството за финансии се прогласува за ненадлежно за одлучување за согласност за вработување бидејќи се бара во време на избори. Истовремено, рече тој, и Антикорупциската комисија ги има оспорено таквите договори, а од Државниот санитарен инспекторат оспорени се по две основи. Едниот е дека барањето за вработување е за време на избори, што е спротивно на одредбите од Изборниот законик, а второто е затоа што не се потпишани од двајцата директори.
Според него, 18-те лица што работеле на Клиниката биле манипулурани со лажни ветувања дека ќе бидат вработени и тие незаконски престојувале во институцијата со невалидни договори, а што е уште потрагично, како што рече директорот, добивале и плата.
„Исплатена е една и пол плата, со што буџетот на Клиниката е оштетен за речиси 650 000 денари. Тоа е значајна сума за нашата институција, немаме пари вишок, секој денар е важен. Целиот случај го документирав и ќе биде процесиран до надлежните државни институции“,
рече Чибишев додавајќи дека на тие 18 лица во текот на вчерашниот ден им рекол дека веќе не треба да доаѓаат на работа.
Новиот директор е задоволен од комуникацијата со министерот за здравство Арбен Таравари, со кој рече дека работат на решавање на проблемот со недостиг на кадар, а веќе направиле и процена колку лица се неопходни за да може да го поминат летото.
„Уште денес ќе поднесеме барање тоа да се процесира и да добиеме согласност. Ќе распишеме конкурс, каубојски вработувања веќе нема да има. Ќе се вработуваат сите според законите на оваа држава, а ние ќе процениме кои се најпогодни за да функционира оваа институција“,
рече Чибишев.
Директорот се осврна и на биологот која работела на Клиниката за кој рече дека исто така била надвор од законот без никаков договор.
„Ја повикавме колешката и направивме договор затоа што, според Законот за здравствената заштита, имам право, без согласност од Финансии, да правам договори за еден отсто од вкупниот број вработени. И во тој еден отсто проценивме дека приоритет е да се прими биологот и од денес функционира на клиниката во рамките на законот“,
рече директорот.
Биологот, како што рече Чибишев, ќе работи само во прва смена, а потоа доколку има потреба од неа за проверка на некој токсиколошки материјал, во попладневните часови таа ќе треба да биде достапна да се појави на Клиниката до 22 часот.
Според него, на Клиниката има недостиг на кадри на сите нивоа – доктори, сестри, болничари, хигиеничари, лаборанти.
„Не се примаат доктори. Добар дел од оние што дојдоа и беа надежни од различни причини ја напуштија Клиниката. Сведени сме на 15 доктори, а процентот на старост е над 50 години. Ни требаат млади, свежи кадри, кои можеме да ги обучиме. Некој треба да продолжи да работи и да ја држи институцијата на ниво“,
рече Чибишев.
Тој додава дека иритира тоа што, како што рече, во изминатите седум години се носени луѓе, а ниту еден од нив не работел.
„Сега доаѓаме во непријатна ситуација кога на тие луѓе треба да им кажеме да си заминат, а ни требаат, не тие што беа туку таков профил на работници. Треба да правиме преместување, па да бидеме непопуларно раководство на некои да не им дадеме сега да користат годишен одмор затоа што ако отидат ќе застане клиниката“,
додаде тој.
Директорот најави дека ќе инсистира до крајот на овој месец да се завршат процедурите, да се вработат луѓе за да може да се одговори на задачите.
Во однос на осигурувањето на Клиниката, за што исто така беше покренато прашањето откако беа поплавени дел од просториите на Клиниката, Чибишев рече дека тендерот е во завршна фаза.