Од СВР Битола соопштија дека пожарите биле предизвикани во периодот од 15 јуни до 10 септември годинава и оти најмладиот кој добил кривична пријава има 27 години, а најстарото лице има 70 години
СВР Битола поднесе пет кривични пријави до Основното јавно обвинителство Битола за предизвикување пожар за четири физички и едно правно лице. Најстарото лице кое се сомничи дека предизвикал пожар е седумдесетгодишник од Битола за кого од МВР велат дека во атарот на селото Братин Дол во Битолскиот Регион, на 29 јули годинава запалил оган во нива со цел да уништи инсекти, но поради силниот ветер, пожарот се проширил и во соседните ниви, по што интервенирала Територијалната противпожарна единица Битола.
„Поднесена е кривична пријава поради основи на сомнение дека пријавениот сторил кривично дело предизвикување општа опасност, предвидено и казниво во чл. 288 ст. 1 од КЗ. Поднесена е кривична пријава против Т. И. (27) од с. Кременица, Битолско, поради постоење на основи на сомнение дека тој на 04.09.2024 запалил стрниште во атарот на село Кременица, Битолско и со тоа сторил кривично дело предизвикување општа опасност, предвидено и казниво во чл. 288 ст. 1 од КЗ“,
се вели во соопштението на МВР.
Кривични пријави добија и Р. Р. (58) со привремен престој во Битола, кој се сомничи дека запалил плевна на четврти август во селото Црнеец, како и 46-годишник од Битола кој на истиот ден во селото Лопатица, на местото викано Белан атар, запалил скара во близината на своето лозје и ја оставил неизгасена, со што предизвикал пожар. Кривична доби и правно лице од Битолско.
„Поднесена е кривична пријава против правно лице по чл. 288 ст. 5 бидејќи на 03.08.2024 околу 17.55 часот во с. Стрежево, Битолско, од искрење на жиците кои биле паднати од бандера во сопственост на пријавеното правно лице, предизвикан е пожар со кој се зафатени сува трева и дрвја“
велат од МВР.
Во текот на летото, низ земјава беснееа рекорден број пожари кои уништија голема површина зеленило. Министерот за внатрешни работи Панче Тошковски на крајот на јули соопшти дека сите предизвикувачи на пожари ќе бидат жестоко санкционирани.