Заменик-директорката на Европскиот совет за надворешна политика со критики за политиката на актуелната власт во Софија кон С Македонија
Бугарија си создаде слика со која се претвора од пасивно-конструктивна во пасивно-агресивна земја
Блокирањето на која било земја кандидат за влез во ЕУ не се прави врз основа на историјата и идентитетот, туку врз основа на достигнувањата, како што е примената на европското законодавство и достигнувањето на европските стандарди. Бугарија ја внесува историјата во процесот на проширување, што би направило практично невозможно или многу тешко за останатите балкански земји да напредуваат.
Ова го вели Весела Чернева, заменик-директор на Европскиот совет за надворешна политика (ECFR) и директор на софиската канцеларија на организацијата, во интервју за бугарски „Капитал“.
„Постојат најмалку 11 билатерални спора на Балканот. Ќе биде опасно ако секој може секого да го блокира. Се разбира, земјите-членки можат да имаат ставови за тоа како една земја го применува европското законодавство, како се приспособува на европските стандарди и ова е основа за соодветно прекинување на преговорите или враќање кон одредено поглавје. Поентата е дека тоа не се прави врз основа на историјата и идентитетот“,
вели Чернева.
Таа посочува дека во Европската Унија постои договор дека овие земји членки се здружиле во заедница затоа што сакаат заедничка иднина, а не затоа што сакаат да ги решат своите историски проблеми. И ова, вели Чернева, се постигнува преку економска кохезија, трговија и модерна дипломатија.
„Бугарија си создаде слика со која се претвора од пасивно-конструктивна во пасивно-агресивна земја и всушност многу луѓе не сфаќаат дека оваа штета е многу тешко да се поправи. Штетите можат да се направат за неколку недели, но потребни се години работа за тие да бидат отстранети“,
истакнува Чернева.
Според неа, Бугарија, исто така, се соочува со нарушен имиџ во регионот и ги посочува впечатоците што ги добила од разни форуми со колеги од регионот во последните две недели, истакнувајќи дека „од Загреб до Тирана односот кон Бугарија е многу негативен“.
„Овој капитал, што беше акумулиран за време на претседателството, кога нашите соседи видоа дека Бугарија навистина сака да работи за европската перспектива на регионот, сега со сигурност е ликвидиран“,
додава таа.
За влијанието на ваквиот став на Бугарија кон нашата земја, според Чернева, ова е чекор назад за целиот регион.
„Република Северна Македонија имаше најголеми причини да очекува поттик од Унијата, особено што Заев го доби вториот мандат токму со ветување за поголема и побрза европска интеграција. Тој го деблокира европскиот пат на Македонија. Алтернативата таму е враќање на владеењето на ВМРО-ДПМНЕ, која секако ќе оди по поинаков тек – во интерес на Русија и на ретроградните сили во регионот“,
оценува Чернева.
Истакнува дека мора да се стави до знаење дека политичката цена што Бугарија ќе ја плати ќе биде многу поголема од придобивките за која било надворешна сила.
Посочува дека ако бугарската влада почнела сериозна дипломатска или каква било друга – економска, културна, образовна работа со Македонците во последната година и половина, ова немало да се случи, а со тоа и влијанието на Каракачанов врз ова прашање немало да биде толку големо.
Во однос на приоритетот на германското претседателство Северна Македонија да ги почне преговорите до крајот на годината, Чернева вели дека отворањето на преговорите со Северна Македонија и Албанија беше на агендата токму за да се сигнализира дека проширувањето не е завршено, дека ќе продолжи.
Според неа, уште не е сѐ завршено бидејќи има време до крајот на годината.
„Рокот што беше даден вчера беше малку вештачки. До крајот на годината може да има уште еден обид, но, искрено кажано, шансите не се многу оптимистички. Не можам да замислам Португалија да се занимава со проширувањето на ЕУ кон Западен Балкан. Можеби Словенија, за која тоа веројатно ќе биде уште потешко“,
оценува Чернева.