Нашиот сигнал е јасен, сакаме решение, но тоа да биде достоинствено – ултиматуми не прифаќаме, порача премиерот Христијан Мицкоски
Понудата на актуелниот претседател на Унгарија, Виктор Орбан, е дадена во име на претседателствувањето на неговата земја со Европската Унија и сега само чекаме кој и какви сигнали ќе испрати од соседна Бугарија, оти нашиот сигнал е јасен – сакаме решение, но тоа да биде достоинствено бидејќи ултиматуми не прифаќаме, рече премиерот Христијан Мицкоски на новинарско прашање за тоа каков е одговорот на земјата по ставот на бугарското МНР дека прашањето за процесот на интеграција во Унијата се заснова на заслуги и оти не дозволува посредување меѓу Европската Унија и земјата која е кандидат за членство.
„Бугарија, бугарската влада, бугарскиот претседател и политичари сакаат сега да ја вовлечат темата Македонија таму во нивното предизборие. Јас сум го кажал тоа повеќе пати, ние нема да бидеме наивни и да влегуваме во такви замки“,
рече Мицкоски.
Тој вели и дека Македонија има свој интерес и цел и сака да чекори цврсто кон реализирање на интересите, а кога станува збор за разговори со источниот сосед, македонската Влада е подготвена за разговараат и да најдат решение кога и да сака другата страна, врз основа на која платформа сакаат или пак план, но притоа нормално да се почитуваат меѓународните стандарди.
Од бугарското Министерство за надворешни работи вчера соопштија дека Скопје го декларира како свој основен надворешнополитички приоритет присоединувањето кон европското семејство на вредности и правила, а тоа подразбира стриктно придржување кон добро познатите преземени ангажмани. Соопштението беше објавено по како што велат континуираните изјави од претставници на С Македонија, кои го ставаат под сомнение принципот pacta sunt servanda.
„Процесот на европска интеграција се заснова на сопствените заслуги и не допушта посредување меѓу ЕУ и земја-кандидат. Единствената гаранција за успех е исполнувањето на воспоставените критериуми и услови“,
се додава во соопштението кое го пренесува Бугарската информативна агенција (БТА).
БТА ја цитираше изјавата на премиерот Христијан Мицкоски дадена во телевизиско гостување, каде што наведува дека унгарскиот премиер Виктор Орбан понудил да биде домаќин на средба меѓу Бугарија и Македонија „за да се види дали може да се приближат позициите“, за да може Скопје да започне преговори со ЕУ.
„Арбитер нека биде Европската Унија, претседавачот на ЕУ не поканува во Будимпешта да ги решиме сите прашања однапред, а не етапно, за да нема повеќе пречки и да нема билатеризација на овој процес. Ајде да започнеме веднаш. Не сум во оваа приказна само за да учествувам, туку успешно да завршам. Ова е суштината на целиот овој процес. Поентата е да не се менува уставот до следната пречка за шест месеци. Ова не е процес кој ќе започне сега и ќе заврши следната недела. Мораме да ги решиме проблемите сега“,
вели Мицкоски во изјавата што ја пренесува и БТА.
Според него, како што пренесува БТА, преговарачката рамка, во која вклучувањето на Бугарите во Уставот е услов за почеток на преговорите на С Македонија со ЕУ, не е договор, а Договорот за пријателство и добрососедство со Бугарија не наведува дека уставот мора да се менува.
Мицкоски во интервјуто рече дека не му паѓа на памет да дава гаранција за нешто што не е сигурен дека ќе го испорача, оценувајќи дека поранешниот државен врв не ги испорачал ветувањата за усвојувањето на уставните измени, како што ветувал пред челниците на Европската Унија (ЕУ).