Во моментов српските еколошки власти не пријавуваат надминување на стандардите за квалитет на воздухот до границата со Бугарија. Српската страна ќе ги извести бугарските контролни органи доколку се случи промена на ситуацијата
Мобилен тим на Извршната агенција за животна средина на Бугарија ќе го следи квалитетот на воздухот во областа Калотина до граничниот премин на Бугарија со Србија откако товарен воз со амонијак излета од шините во областа на градот Пирот, јави дописникот на МИА од Софија.
Експерти ќе ги следат индикаторите преку мобилна автоматска станица за мерење на квалитетот на атмосферскиот воздух. Станицата е поставена во близина на граничниот премин со Србија и таму ќе остане и во наредните денови.
Во моментов српските еколошки власти не пријавуваат надминување на стандардите за квалитет на воздухот до границата со Бугарија. Српската страна ќе ги извести бугарските контролни органи доколку се случи промена на ситуацијата.
„Инцидентот се случил по течението на блиската река Нишава, која извира под планината Ком на Берковската Планина. Со оглед на насоката на струјата на реката, не може да се очекува загадување на нејзините води на бугарска територија“,
велат од агенцијата за животна средина.
Училиштата и градинките во Пирот и денеска ќе бидат затворени
Штабот за вонредни ситуации во Пирот одлучи поради истекување на амонијак од оштетениот вагон-цистерна денеска да нема настава во основните и средните училишта, нема да работат градинките, а се препорачува и стопирање со работа во фабриките, пред сè во индустриската зона.
Градоначалникот на Пирот, Владан Васиќ, за Радио-телевизија Војводина изјави дека ситуацијата е под контрола и дека на пет мерни места во Пирот, концентрацијата на амонијак денеска била нула, но на местото на инцидентот таа сè уште е висока.