Бугарија ги чека измените во Уставот на Северна Македонија, му порачал Денков на Ковачевски

Во двете земји има сили кои не сакаат добрососедски односи и се обидуваат да поттикнат тензии. Во оваа средина бугарскиот кабинет ќе биде извор на мир. Но, важно е да нема инциденти во Северна Македонија, а и државата веднаш да реагира доколку дојде до тоа, за да докаже дека се грижи подеднакво за сите свои граѓани, порачал Денков во телефонски разговор со македонскиот колега, информираат од бугарската влада

Новата бугарска влада очекува Република Северна Македонија да ги прифати измените на нејзиниот Устав, како што е договорено со европскиот компромис постигнат во 2022 година. Ова во телефонски разговор со македонскиот премиер Димитар Ковачевски го порачал новоизбраниот бугарски премиер Николај Денков, информираат од бугарската влада.

„Какви и напори да вложиме за позитивен развој на билатералните односи, тие ќе останат во втор план или нема да се реализираат доколку не се реши соодветно прашањето за вклучување на Бугарите во основниот закон на Северна Македонија“,
истакнал Денков.

Тој ја потврдил поддршката на Бугарија за интеграцијата на Западен Балкан во Европската Унија, вклучително и Северна Македонија, „бидејќи тоа е во интерес на сите“.

„Се очекува Северна Македонија да постигне брз напредок во реформскиот процес и да ги исполни договорените услови усвоени со заклучоците на Советот на Европската унија во 2022 година, Преговарачката рамка и билатералните протоколи од состаноците на Меѓувладината комисија од чл. 12 од Договорот за пријателство, соработка и добрососедство од 2017 година. Нашата земја е подготвена да работи заедно со својот сосед за исполнување на преземените обврски. Во двете земји има сили кои не сакаат добрососедски односи и се обидуваат да поттикнат тензии. Во оваа средина, бугарскиот кабинет ќе биде извор на мир. Но, важно е да нема инциденти во Северна Македонија, а и државата веднаш да реагира доколку дојде до тоа, за да докаже дека се грижи подеднакво за сите свои граѓани“,
посочил Денков во телефонскиот разговор со Ковачевски.

За разговорот информираа и од македонската влада.