Најголемиот дел од влезовите се уште се регистрирани на „Западнобалканската рута“, каде имало повеќе од 128 000 илегални влезови, а мигрантите на таа рута се главно од Бурунди, Авганистан и Ирак
Од јануари до октомври годинава бројот на илегални мигранти кои влегле во Европската унија се зголемил на повеќе од 275 000, соопшти денеска граничната агенција на Европската унија.
Ова е за 73 отсто повеќе во однос на истиот период лани и е највисока бројка од врвот забележан во 2016 година, се вели во соопштението кое го пренесува Слободна Европа.
Европската агенција за гранична и крајбрежна стража Фронтекс соопшти дека најголемиот дел од влезовите се уште се регистрирани на „Западнобалканската рута“, каде имало повеќе од 128 000 илегални влезови, а мигрантите на таа рута се главно од Бурунди, Авганистан и Ирак.
Фронтекс објави дека големиот број премини во областа на Западен Балкан „може да се припише на повторените обиди за преминување на границата од мигранти кои се веќе присутни“ во областа, но и на луѓе кои „го злоупотребуваат безвизниот режим“.
Како одговор, Фронтекс испрати повеќе од 500 полицајци и службеници во регионот и сега повеќе од 2 300 нивни кадри учествуваат во различни оперативни активности на надворешните граници на ЕУ.
Централната медитеранска рута, со мигранти кои главно се обидуваат да стигнат до Италија, исто така забележа пораст на пристигнувања од 48 отсто, надминувајќи 79 000 за десет месеци од 2022 година, се вели во соопштението на Фронтекс.
Активноста на мигрантите е забавена на „западно медитеранската рута“ и на копнената рута од Украина и Белорусија.
Членките на ЕУ, Полска, Литванија и Летонија изградија ѕидови на границата со Белорусија за да ги спречат мигрантите да се обидат илегално да влезат.