Во југозападниот дел на Белорусија во градот Брест денеска се случи судир меѓу граѓани и припадници на полицијата. Како што тврдат од Министерството за внатрешни работи на Белорусија, граѓаните биле вооружени и први ги нападнале полицајците.
Во соопштението се наведува дека и по испуканите куршуми во воздух нападите не запреле, па полицајците за да се запштитат отвориле оган и повредиле еден напаѓач.
Според информациите на белоруското МВР непознат напаѓач фрлил молотов коктел на полициско возило во подрачјето на Брест.
Протестите низ земјата зачестија откако во неделата како резултат на претседателските избори, повторно за победник беше прогласен Александар Лукашенко, кој е познат како „последниот диктатор во Европа“, бидејќи на власт е од 1994 година.
Опозицијата остро се спротивстави на изборните резултати квалификувајќи ги како лажирани.
Во протестите се приведени 6 000 лица, од кои 1 000 само во последните 24 часа.
Белоруската група за заштита на човековите права Вјазна соопшти дека голем број од демонстрантите кои се повредени се плашат да побараат лекарска помош.
„Имаме информации дека властите побарале од медицинскиот персонал да ги пријават сите повреди во полиција. А лекарите на протестирачите гледаат не како на жртви, туку како непријатели на Белорусија“,
изјави адвокатот на Вјазна, Павел Сапелко.