Според неофицијалните информации кои ги објави порталот Косова прес, бремената жена која викендов дошла во клиниката да се породи, била разведена и се сомнева оти била застрелана со неколку куршуми од поранешниот сопруг, со кого, според изјави на очевидци на кои се повика медиумот, имала вербален разговор непосредно пред да биде усмртена
Полицијата веднаш излегла на местото на настанот, како и лекарската екипа која констатирала смрт кај жената на возраст од околу 35 години. Засега полицијата не објави информации за осомничени за овој инцидент
Пред Клиниката за гинекологија во Приштина денеска била убиена бремена жена на возраст од околу 35 години која дошла на оваа клиника да се породи, потврди косовската полиција.
Полицијата соопшти дека околу 18:00 часот добила информација дека во дворот на Универзитетскиот клинички центар на Косово е пронајдено мртво тело.
„Во моментов полицијата во координација со државниот обвинител започна истрага и продолжува со преземање на сите истражни дејствија, со цел целосно расветлување на настанот“,
се наведува во соопштението на косовската полиција.
Полицијата засега нема соопштено дали уапсила осомничени за овој инцидент.
Според неофицијални информации кои ги објави порталот Косова прес, бремената жена која викендов дошла во клиниката да се породи, била разведена и се сомнева оти била застрелана со неколку куршуми од поранешниот сопруг, со кого, според изјави на очевидци на кои се повика медиумот, имала вербален разговор непосредно пред да биде усмртена.
Полицијата веднаш излегла на местото на настанот, како и лекарската екипа која констатирала смрт кај жената на возраст од околу 35 години.
За случајот реагираа премиерот на Косово Албин Курти и косовската претседателка Вјоса Османи.
Косовскиот премиер Курти во објава на Фејсбук напиша дека „животот кој носеше друг живот исчезна“, нарекувајќи го убиството неприфатливо и неподносливо.
„Животот кој носеше друг живот исчезна. Жената била бремена. Околу 35 години, ниту половина од животот. Детето што сакала да го роди не ни започна живот. Суров убиец. ‘Двајца косовски државјани помалку, двајца Албанци помалку’, ќе мислат нашите непријатели. Неприфатливо и неподносливо“,
гласи пораката на косовскиот премиер на Фејсбук.
На социјалните мрежи се огласи и претседателката на Косово, Вјоса Османи, која порача дека мора да се стави крај на бранот на криминалот и фемицидот врз жените, барајќи правда за жртвите на насилство.
„Вечерва надежта и вербата се потребни повеќе од кога било. Овој криминален бран врз жените и овој фемицид мора да заврши. Ние сме тестирани не само како држава, туку и како општество. Нема веќе изговори. Животот на девојките и жените, како животот на секој наш граѓанин е свет. Одговорот на силувачите, насилниците и убијците е ред, закон и максимална казна. Нашиот долг кон жртвите на насилство, неродени животи и неправедно прекинати животи е единствено правда“,
напиша косовската претседателка Османи на Фејсбук.
Ова е втора жена која е убиена во последните денови на Косово, откако на 25 ноември беше објавено дека маж си ја убил сопругата со секира.
На 25 ноември во Косово започна кампањата „16 дена активизам против родово базирано насилство“ организирана од Министерството за правда.
Бројот на случаи на семејно насилство во Косово е зголемен во последните години.
Според податоците на косовската полиција, кои ги објави регионалниот сервис на Радио Слободна Европа, во текот на 2020 година во Косово се евидентирани 2 069 случаи на семејно насилство, со 2 101 жртва, додека, пак, во 2021 година се евидентирани 2 456 случаи на семејно насилство со 2 486 жртви.
Во меѓувреме, во периодот јануари-септември 2022 година се регистрирани 2 067 случаи на семејно насилство со 2 126 жртви.