Тој истакна дека ЕУ ги замрзнала руските средства во вредност од речиси 20 милијарди евра откако Москва ја нападна Украина и дека западните санкции доведоа и до замрзнување на 300 милијарди евра од девизните резерви на централната банка на Русија ширум светот. Борел рече дека овие средства се блокирани, но истакна дека има разлика помеѓу блокирање и конфискација
Шефот за надворешна политика на ЕУ, Жозеп Борел, на разговорите за регионална безбедност на овогодишната конференција на ОБСЕ денеска изјави дека планира да разговара со своите колеги за сите расположливи правни средства за да се осигури дека Русија ќе плати за обновата на Украина која е разурната од војната, јавува регионалниот сервис на Радио Слободна Европа.
Борел говореше на почетокот на овогодинешната дводневна министерска конференција на Организацијата за безбедност и соработка во Европа (ОБСЕ) во централниот полски град Лоѓ.
„Денеска ќе се сретнам со моите колеги министри за надворешни работи… Ќе ги истражиме сите правни опции за да се увериме дека Русија ќе плати за уништувањето што го предизвикува во Украина“,
изјави Борел за новинарите.
Тој истакна дека ЕУ ги замрзнала руските средства во вредност од речиси 20 милијарди евра, откако Москва ја нападна Украина и дека западните санкции доведоа и до замрзнување на 300 милијарди евра од девизните резерви на Централната банка на Русија ширум светот.
„Овие резерви се блокирани. Но, постои голема разлика помеѓу блокирање и конфискација“,
рече Борел, пренесе АФП.
Полска е домаќин на овогодинешната министерска конференција, бидејќи земјата во моментов претседава со ОБСЕ, организацијата во која се и Русија и Украина.
Варшава одби да му дозволи на рускиот министер за надворешни работи Сергеј Лавров, кој е под европски санкции, да влезе во Полска на конференцијата, што предизвика лут одговор од Москва.
Наместо тоа, руската делегација на конференцијата ја предводи нејзиниот постојан претставник во ОБСЕ, Александар Лукашевич.
ОБСЕ е основана во 1975 година, во екот на Студената војна, за да ги поттикне односите меѓу западниот и источниот блок.
Во моментов има 57 земји-членки, вклучувајќи ги и земјите од НАТО и сојузниците на Москва.
На дводневната министерска конференција на ОБСЕ во Лоѓ од земјава учествува шефот на дипломатијата Бујар Османи.