Борел наведе дека практичната помош за регионот и јасниот напредок кон интеграцијата во ЕУ се клучни за одржување на регионот цврсто да оди на патот кон ЕУ и додаде оти им повторил на лидерите на С Македонија и Албанија дека двете земји ги исполниле сите обврски за почеток на пристапните преговори со ЕУ
Високиот претставник на Европската Унија, Жозеп Борел, истакна дека иднината на Западен Балкан е „јасна, во рамките на ЕУ“.
По повод минатонеделните посети на Северна Македонија, Албанија и Босна и Херцеговина, во блог насловен „Време е да се оди напред во интеграцијата на Западен Балкан во ЕУ“, Борел истакна дека лидерите јасно ја осудија руската инвазија на Украина и се приклучија на санкциите на ЕУ против Русија.
Тој истакна дека и пред војната во Украина, која враќа „живи спомени“ од војните за време на распадот на поранешна Југославија, констатирано е загрижувачко враќање на тензиите во регионот, особено во БиХ и меѓу Србија и Косово.
Борел ги повика сите земји во регионот да продолжат со блиската соработка со ЕУ за „Западен Балкан да биде мирен, стабилен и цврсто да оди на патот кон ЕУ“.
„Видовме надворешно мешање кое се обидува да ги дестабилизира нашите соседи и да ја ослабне Европската Унија, особено преку подмолните и добро документирани кампањи за дезинформација на Русија“,
рече тој.
Тој, меѓу другото, посочи дека се искористени тешкотиите поврзани со ковид-пандемијата низ Европа, но дека тие кампањи значително се зголемиле од почетокот на војната во Украина. Исто така, стравувањата во Западен Балкан од поскапување на енергијата и храната како резултат на војната во Украина се многу силни, имајќи предвид дека овие земји се многу посиромашни од земјите членки на ЕУ и тоа беше истакнато за време на неговите разговори во регионот.
Борел наведе дека практичната помош за регионот и јасниот напредок кон интеграцијата во ЕУ се клучни за одржување на регионот цврсто да оди на патот кон ЕУ и додаде дека им повторил на лидерите на С Македонија и Албанија дека двете земји ги исполниле сите обврски за почеток на пристапните преговори со ЕУ.