Високиот претставник на ЕУ за надворешна политика на Твитер напиша дека насилството никогаш не може да биде решение и го поздрави „одговорното раководство на српскиот претседател Александар Вучиќ и косовскиот премиер Албин Курти, како и тимската работа на ЕУ, САД и КФОР“
Дипломатијата преовлада во намалувањето на тензиите на северот на Косово, откако вчера доцна вечерта беше постигнат договор за повлекување на барикадите што косовските Срби ги поставија на патната инфраструктура на северот на Косово.
Ова денеска го изјави високиот претставник на Европската Унија (ЕУ) за надворешна политика и безбедност Жозеп Борел.
Борел на Твитер напиша дека насилството никогаш не може да биде решение и го поздрави „одговорното раководство на српскиот претседател Александар Вучиќ и косовскиот премиер Албин Курти, како и тимската работа на ЕУ, САД и КФОР“.
„Благодарам на сите вклучени. Сега ни треба итен напредок во дијалогот“,
изјави Борел.
Diplomacy prevailed in de-escalating tensions in north Kosovo. Violence can never be a solution.
— Josep Borrell Fontelles (@JosepBorrellF) December 29, 2022
Welcome responsible leadership of President Vučić & Prime Minister Kurti.
Great EU, US & @NATO_KFOR teamwork. Thanks to all involved!
We now need urgent progress in the Dialogue.
Во градот Рударе на северот на Косово, денеска попладне започна отстранувањето на барикадите, јавува регионалниот сервис на Радио Слободна Европа (РСЕ).
Претходно истиот ден беше отстранета и барикадата која се наоѓаше на два километра од граничниот премин „Мердаре“, на територијата на Србија.
Повторно за сообраќај е отворен и граничниот премин „Мердаре“, меѓу Косово и Србија, откако пред два дена беше затворен од косовската полиција бидејќи група Срби поставија блокади од српската страна на границата.
Денеска во утринските часови беа опожарени два камиони на барикадата кај местото Дудин Крш во Северна Митровица, потврди косовската полиција. Повредени нема, но според полицијата има материјална штета.
Српскиот претседател Александар Вучиќ доцна синоќа, по средбата со косовските Срби, соопшти дека отстранувањето на барикадите од северот на Косово ќе започне денеска во утринските часови.
Претходно српскиот претседател на средбата со претставници на Србите од Косово изјави дека се дадени гаранции дека нивните барања за отстранување на барикадите ќе бидат исполнети.
Шефот на Канцеларијата за Косово во Владата на Србија, Петар Петковиќ, вчера пред Вучиќ да замине во Рашка на средба со претставниците на косовските Срби изјави дека се добиени „најсилните досега“ гаранции од САД и Европската унија во врска со барањата на Србите за нивно повлекување од барикадите.
Барикадите на северот на Косово беа подигнати од страна на групи косовски Срби на 10 декември, откако косовските власти го уапсија поранешниот српски полицаец Дејан Пантиќ, осомничен дека учествувал во напад врз членовите на Централната изборна комисија на Косово.
Неговото ослободување беше еден од условите за отстранување на блокадите. Така, вчера судските власти на Косово донесоа одлука со која мерката за обезбедување присуство на Пантиќ беше заменета од притвор во домашен притвор.