Случајот се однесува на невладината организација „Меѓународен сојуз“ преку која, според обвинението, биле измамени бизнисмени кои уплаќале пари за наводни центри за возрасни лица. За обвинетите, пак, случајот е измислица
„Едвај чекам да дојде 1 јули“, беа зборовите на Бојан Јовановски-Боки 13 кога откако беше осуден на 9 години затвор во судница зборуваше дека нема да бега и затоа треба да излезе од притвор и да се брани од слобода.
Но, судот одлучи тој да остане во Шутка и оттаму утрово треба да биде спроведен до Основниот кривичен суд во Скопје. Судската зграда му е добро позната, во неа тој присуствуваше на 40 рочишта за предметот „Рекет“, а сега повторно ќе седне на обвинителна клупа, но за друг предмет.
За денеска (1 јули) е закажано првото рочиште за случајот кој се однесува на работата не неговата невладина организација Меѓународен сојуз.
Обвинение за измама и перење пари
Јовановски е првообвинет и се товари за делата измама и перење пари. На обвинителна клупа со него треба да седнат и: пратеничката во последниот парламентарен состав и потпретседателка на Собранието, Фросина Ременски; заменик-претседателката на „Меѓународниот сојуз“, Јасна Мандиќ; таткото на Боки – Миле Јовановски и асистентката Христина Блажевска.
Ременски е обвинета за помагање во делото измама, Мандиќ и Блажевска за помагање на двете дела (измама и перење пари), а таткото на Боки за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.
Обвинителството за гонење организиран криминал и корупција го поднесе обвинението на 3 јануари годинава, а судот го одобри на 12 мај. Судскиот процес ќе го води судечки совет составен од двајца поротници и судијката Софче Гаврилова-Ефремова кока беше втор судија во случајот „Рекет“.
Двајца бизнисмени доведени во заблуда, тврди обвинителството – за Боки и Ременски случајот е конструкција
Предметот за Меѓународниот сојуз, Јовановски досега неколкупати го коментираше додека траеше постапката за „Рекет“ пред првостепениот суд и тврдеше дека во него станува збор за небулозни тврдења на обвинителството и за конструиран случај.
Обвинителството, пак, кога го поднесе обвинението посочи дека во 2017 и 2018 тој како претседател на невладината организација измамил двајца бизнисмени. Лажно прикажувал дека ќе обезбеди државно земјиште за изградба на Европски центар за возрасни лица и мобилни сервиси, како и субвенции од страна на државата. Доведени во заблуда, бизнисмените, според обвинението, преку Македонска авторска агенција му исплатиле суми на пари во висина од 719 905 и 233 821 евра.
Асистентка и Мандиќ, пак, тврди обвинителството, ги изготвувале договорите, ги подигале уплатените пари и му ги давале на рака на Боки, а со тоа со умисла му помагале да ги пушти во оптек иако знаеле дека потекнуваат од кривични дела.
Ременски, користејќи го својот углед и авторитет, одела на средбите на Боки со оштетените.
„Третообвинетата со својот углед и авторитет го поддржувала првообвинетиот на средбите со оштетените, давајќи му совети и упатства за да оштетените стекнат доверба во наводниот проект и однапред да уплатат одреден износ пари и да ги потпишат договорите“,
наведоа од обвинителството кога го поднесоа обвинението.
Кога стигна веста дека е поднесено обвинението, Ременски излезе со уверување дека ќе ја докаже својата невиност и рече дека ова е со цел нејзина политичка елиминација.
„Одлуката на обвинителството е избрзана. Конструкции без докази можат да резултираат со обвинение. Во оваа смешна постапка ќе се види дека реално нема докази за ова за коешто обвинителството ме сомничи. Факт е дека порачките за политички елиминации сè уште постојат и овој ден не е случајно избран. Овој процес може да докаже само еден голем апсурд“,
изјави Ременски на 3 јануари 2020.
Од денес тие ќе имаат можност да ги спротивстават своите аргументи и во судница.