Градоначалникот на Општина Центар, Саша Богдановиќ се уште не ја потпишал дозволата за градба на земјиштето спроти хотелот „Холидеј ин“, со образложение дека чека да завршат управните постапки. Во интервју за „Радио слободна Европа“, Богдановиќ вели дека секако ќе има изградба на деловни или станбени објетки во тој дел од центарот на градот, но ќе се допрецизираат одредени параметри.
„Сè зависи како ќе завршат одредени постапки коишто ги водиме. Јас само сакам да ги запознам граѓаните дека без разлика што и да се случи, таму е предвидено некој развој кој го дозволува Општината и претходно со Детален урбанистички план, а и доколку дојде до одредени промени, повторно ќе има некој развој, дали во деловен или станбен простор, зависи како ќе заврши на крај планот. Ние до пред извесно време, пред одлуката на Уставен суд, односно решението за поништување на нашата одлука за неспроведување на Детални урбанистички планови, имавме начин како да не се постапува по тие Детални урбанистички планови. Но, за жал, Уставниот суд ни ја укинаа таа одлука и сега сме во една фаза каде што се дозволува на сопствениците на земјиштето да поднесуваат барања за одобрение, а ние се обидуваме со одредени мерки да исправиме тоа што може да се исправи, така што сè зависи од исходот на тие постапки коишто ќе се водат“
вели Богдановиќ.
Богдановиќ ја повика уште еднаш и Антикорупциската комисија да истражи дали имало прекршувања во постапките за избор на проектантската куќа која го црта Деталниот урбанистичкин план.
„Ако антикорупциска утврдила одредени пречекорувања, тогаш треба да покрене одредени постапки до надлежни институции. Ние досега сме покренале одредени постапки. Е сега зошто велат повторно е дадено… не го дава Општината, не е мој избор јас да кажам ќе до доделам на тој и тој. Си има јавна постапка. Во законот стои, до ден денеска, дека најниската цена е главен услов за некој да ја добие работата. Ние во тоа време кога се јави таа ниска цена прашавме до самиот изработувач на планот и тие ни одговорија дека тие тоа сакаат да го направат заради референца. Ако го раскиневме договорот и склучевме договор со второстепената, којашто исто така немаше многу висока цена, некаде околу 20 илјади денари за километар квадратен, и тогаш ќе направевме прекршок и ќе дојдеше истата Антикорупциска или друга институција и ќе кажеше – Како сте имале пониска цена, без разлика што е нереална, а вие сте склучиле со повисока, така што не сме ние криви што некој така ги напишал законите во нашата држава“
додава Богдановиќ.
На прашањето дали повторно ќе се кандидира за градоначалник, Богдановиќ вели дека не е само до желбата, туку предлогот треба да помине и низ партиските филтри. Тој не се согласува со рангирањето на 10-то место по успешност во работата на градоначалниците, бидејќи се смета за единствен од институциите кои се справуваат со несоодветните градби на територија на општина Центар.
„Сакам да се потврди, бидејќи единствениот човек кој досега застана на патот тоа сум јас. Јас не сум слушнал на ниту едно друго место некој да донесе и да спроведе такви радикални одлуки и на крајот и после пресуда на Уставен суд да ја продолжи битката. Пак ќе напоменам тие планови не сум ги донел јас, ги донел некој многу, многу години претходно, тие планови, за жал, предизвикуваат правни дејствија и до ден денешен, за тие планови, за жал, никој досега не одговарал, се надевам дека во некое брзо време, ако, ај да кажам, проработат одредени институции, пред сè судски, дека ќе имаме одреден епилог. Затоа сметам дека треба да ја продолжам битката, бидејќи не е само да ги менувате плановите, ние видиме многу други постапки, знаете дека имаме поништено низа одобренија за градба, коишто дошле до правосилност“
вели Богдановиќ.