Градоначалникот во заминување реагира на наводите на градоначалничката кандидатка на ВМРО-ДПМНЕ дека и СДСМ има придонес во реализацијата на „Скопје 2014“
Градоначалникот на Центар, Саша Богдановиќ, одговорно тврди дека ниту еден од претставниците на оваа власт не учествувал во донесување на одлуките поврзани со еден од најкриминалните проекти не само во државата, туку и во Европа, реагираат денеска од Општината, по наводите на кандидатката на ВМРО-ДПМНЕ за градоначалничка, Наташа Котлар, дека и СДСМ има придонес во реализацијата на „Скопје 2014“.
„Очигледно за проектот ’Скопје 2014’ кој, освен урбанистички, беше културолошки и идеолошки проект на Никола Груевски и на ВМРО-ДПМНЕ, некој, свесно или несвесно, ја довел кандидатката на ВМРО-ДПМНЕ за градоначалник во голема заблуда. Како пример за госпоѓата Котлар, која очигледно не е до крај запознаена со проектот, Законот за урбанистичко планирање, кој е донесен во 2005 година е менуван 10 пати од 2006 до 2014 година, период кога ВМРО-ДПМНЕ ја има централната власт. Подоцна е донесен нов Закон за просторно и урбанистичко планирање, кој во периодот од 2014 до 2016 е изменет шест пати, со цел да му удоволи на озлогласениот проект. Потоа, ДУП ’Мал ринг’, каде што е сконцентриран најголемиот дел од ’Скопје 2014’ е менуван девет пати, во периодот од 2006 до 2012 година, а само во 2012 година е изменет три пати.“,
се наведува во пишана изјава на Богданови, кој во октомври заминува од градоначалничката функција, со оглед на тоа што не е кандидат на СДСМ за нов мандат.
Тој во изјавата посочува и дека ВМРО-ДПМНЕ треба да се подготви за уште еден пораз на претстојните локални избори.
„Беспредметни и, пред сѐ, лажни се тврдењата на професорката Котлар за тоа кој и како го носел проектот ’Скопје 2014’. Граѓаните, особено жителите на Центар, паметат и се сеќаваат на криминалите на минатата власт. Токму затоа, на претстојните локални избори, и госпоѓата Котлар и партијата што ја поддржува, ВМРО-ДПМНЕ, треба да се подготват за уште еден голем пораз на коруптивните и криминални политики што тие ги застапуваат“,
оценува Богдановиќ.
Наташа Котлар од Институтот за национална историја, како претставничка на партија Глас за Македонија, на чие чело е Солза Грчева, доби поддршка од опозициската ВМРО-ДПМНЕ да биде кандидатка за градоначалничка на Центар.
Во градоначалничката трка таа ќе го има за главен ривал Горан Герасимовски, претседател на општинската организација на СДСМ во Центар, откако владејачката партија реши да не го кандидира повторно досегашниот градоначалник Богдановиќ.
СДСМ има градоначалник во Центар од 2013 година. Во претходниот мандат, на чело на општината беше Андреј Жерновски, кога СДСМ беше во опозиција, а во 2017 година социјалдемократите го кандидираа Богдановиќ, кој победи во првиот круг, со над 60 проценти поддршка од излезените гласачи.