Со либерализацијата на железничкиот транспорт и отворањето на пазарот во идниот период ќе може да се разговара за отворање на границите и влегување и на други оператори на територијата на државава, најавува министерот за транспорт и врски
Поддршката од државата за „Железници на РСМ – транспорт“ за одржување на патничките линии и за опстојување на претпријатието ќе продолжи и во наредниот период, а ќе има и повеќе можности за патување на граѓаните со овој транспорт во кој ќе има либерализација, со што на пазарот би влегле и други оператори, најави министерот за транспорт и врски Благој Бочварски.
Според него, со либерализацијата на железничкиот транспорт и отворањето на пазарот во идниот период ќе може да се разговара на темата за, како што рече, отворање на границите на некој начин и влегување и на други оператори на територијата на државава.
„Со тоа ќе се отворат повеќе можности за граѓаните за да патуваат со железничкиот транспорт“,
изјави Бочварски.
По намалувањето на влијанието на економско-енергетската криза ќе се разговара и за третата опција, односно преструктуирање на ова претпријатие со што, како што потенцира Бочварски, ќе добиеме подобри и навремени услуги и задоволство кај граѓаните во однос на железничкиот транспорт.
Според него, за оние делници каде што има интерес од граѓаните за патување со железница е обезбедена поддршка за претпријатието, но засега не се планира обнова на возниот парк на возовите кои сообраќаат кон Кичево и Кочани затоа што интересот за тие две линии е намален.
„Интересот за овие две делници е исклучително намален, и кон Кочани и кон Кичево, и токму поради тоа сите линии кои се оперативни, на пример Скопје – Велес оперираат во овој момент и останатите каде што имаме доволен број патници, Министерството за транспорт и Владата веќе имаат одобрено финансиски средства каде што даваме целосна поддршка за ова претпријатие да продолжи со оперирање на јавниот патнички превоз во Железницата. Така ќе продолжиме да работиме и во идниот период со цел да опстои во овие тешки времиња бидејќи се работи за претпријатие од исклучителна важност“,
изјави министерот на новинарско прашање, по настанот по повод заокружување на изградбата на магистралниот гасовод Неготино – Кавадарци – Битола.
Во третиот квартал годинава во железничкиот сообраќај се реализирани вкупно 352,4 илјади возни километри, што претставува намалување за 15,5 проценти во однос на истиот период лани, како резултат на намалувањето на бројот на возови и во патничкиот и во товарниот сообраќај.