Битолчанец го изгуби животот откако со електричен тротинет удрил во патничко возило.
Како што соопштија од МВР, сообраќајката се случила вчера попладне на крстосницата од улиците .„8 Септември“ и „Арон Ароести“ во Битола.
Во сообраќајката учествувале патничко возило „фолксваген туран“, со битолски регистарски ознаки, управувано од Ф.Ј (21) од Битола и електричен тротинет управуван од О.П. (26) од Битола. По незгодата О.П. бил пренесен во Клиничка болница Битола, каде што им подлегнал на повредите. Полицијата извршила увид на местото на настанот, а по наредба на јавен обвинител телото на починатиот е предадено на обдукција.
Вечерта во овој регион се случила уште една сообраќајна незгода. На регионалниот пат Новаци-Битола, кај с. Логоварди, Ј.Б. (59) од Општина Новаци, управувајќи патничко возило „фолксваген голф“ со битолски регистарски ознаки, изгубил контрола над возилото и излетал од коловозот.
Тој е пренесен во Клиничка болница – Битола за укажување лекарска помош, каде што му биле констатирани тешки телесни повреди. Увид на местото на незгодата изврши увидна екипа на СВР Битола.