Фатмир Битиќи нагласува дека граѓаните конечно ќе почувствуваат системска заштита од покачување на цените, а придобивките ќе бидат поквалитетни и поевтини производи на пазарот
Пратеникот Фатмир Битиќи, кој беше вицепремиер за економски прашања во владата на СДСМ-ДУИ, денеска посочи дека со тоа што стапи во сила Законот за нефер трговски практики, кој беше изготвен и донесен во март годинава од владата во која тој учествуваше, ќе го заштити буџетот на граѓаните.
„Овој закон не е празна декларација, тој е конкретна мерка која ќе го заштити буџетот на граѓаните и ќе го намали самоволието на трговците и добавувачите. За првпат, создадовме системско решение со кое ќе ставиме крај на манипулациите со цените. Од денес ќе важат јасни правила и се става ред во односите меѓу трговците и добавувачите со прехранбени производи“,
изјави Битиќи.
Според него, Законот нема да ги наруши добавувачките ланци и нема да предизвика хаос на пазарот.
„Со овој закон се регулираат 26 нефер трговски практики, со кои над 2 500 земјоделски и прехранбени производи ќе имаат ограничени маржи од 10%. Тоа значи дека нема да има просторот за неосновано покачување на цените и создавање на дополнителни трошоци кои директно ги погодуваат семејните буџети“,
посочи поранешниот вицепремиер.
Битиќи вели, граѓаните конечно ќе почувствуваат системска заштита од покачување на цените, а придобивките ќе бидат поквалитетни и поевтини производи на пазарот, транспарентни деловни практики и крај на ситуацијата во која потрошувачите се принудени да плаќаат повисоки цени поради нечесни договори и шпекулации.
Тој ги повика трговците да го почитуваат законот, а надлежните институции да преземат проактивна улога и да го спроведуваат овој закон со максимална контрола и посветеност.
Тој се осврна и на актуелната влада, со тврдење дека нема вистински план за справување со економските предизвици.
„СДСМ со овој закон понуди вистинско и трајно решение за стабилни цени и заштита на животниот стандард. Ова е само уште еден пример како политиките на СДСМ се насочени кон вистинските интереси на граѓаните, за разлика од власта која импровизира и создава простор за нови ценовни шокови во секоја следна сезона“,
рече Фатмир Битиќи.