Фатмир Битиќи не прецизира на кого мисли, но вели дека се работи за еден од кандидатите кој претходно бојкотирал, не ги поддржувал партиските активности, а секогаш добивал од партијата
Фатмир Битиќи размислувал да се кандидира за претседател на СДСМ, но одлучил дека на партијата не ѝ е потребна дополнителна поделба. Во неделното интервју за РСЕ, тој, меѓу другото, вели оти еден од четворицата кандидати за лидер на партијата не верува во социјалдемократските вредности.
„Сметам дека изборната кампања за претседател не се одвива на најдобар начин бидејќи не сите учесници во изборната кампања веруваат целосно во вредностите на СДСМ и иделогијата и забораваат дека ова не е лична битка. Ова е битка за партијата, за државотворна партија која покажала низ децении дека се грижи за сите“,
изјави Битиќи.
Не прецизира на кого мисли, но вели дека се работи за еден од кандидатите кој претходно бојкотирал, не ги поддржувал партиските активности, а секогаш добивал од партијата.
Прашан дали ќе ги поддржи предлог-измените на Законот за енергетика по скратена постапка од Христијан Мицкоски, Битиќи одговара потврдно.
„Секако ќе видиме, од тоа што можам да го прочитам од неговите изјави, тој сака во суштина да му се продолжи лиценцата на универзалниот снабдувач и дополнително јас ќе го поддржам тој закон бидејќи ВМРО-ДПМНЕ признава дека сме направиле добра тендерска постапка бидејќи сме успеале да ја намалиме маржата на добивка која ЕВН ја тарифира кон граѓаните, секако, бидејќи е наш резултат и исход од доброто работење, ќе го поддржиме тој закон бидејќи сметам дека сѐ што е добро за граѓаните ќе треба да се поддржи“,
одговара Битиќи.
Тој не ја отфрла можноста повторно да биде дел од раководството на СДСМ, но за тоа ќе треба да биде повикан, без самиот да се наметнува.
Фатмир Битиќи е актуелен пратеник во македонското Собрание.