Вицепремиерот за економски прашања се надева дека здравствените бројки ќе укажат дека полека ќе можеме да се вратиме во нормалниот живот, а ако тоа не е возможно ќе има мерки за стопанството
Доколку е потребно, Владата ќе донесе нови мерки за поддршка на угостителите и граѓаните поради воведувањето на последните рестриктивни мерки за влез во угостителските објекти и затворените трговските центри, најави денеска вицепремиерот за економски прашања Фатмир Битиќи.
Тој вели дека засега тоа не е потребно, бидејќи мерките се привремени.
„Ги следиме донесените рестриктивни мерки и доколку заеднички одлучиме дека финансиските импликации се толку големи што бараат одредена поддршка ќе седнеме и ќе разговараме. Секако мерките ќе бидат за тие кои се најмногу погодени. Да се надеваме дека здравствените бројки ќе укажат дека полека ќе можеме да се вратиме во нормалниот живот, а ако тоа не е возможно и досега сме докажале дека носиме мерки за стопанството кога е тоа потребно“,
рече Битиќи одговарајќи на новинарско прашање дали Владата размислуваме за некоја нова мерка за поддршка на угостителите и граѓаните поради неодамна донесените рестриктивни мерки.
Од воведувањето на последниот сет мерки на 16 август според кои во угостителските објекти може да влезат само лица со сертификат за вакцинација и прележани до 45 дена, голем број угостители и поединечно и преку комората изразија загриженост дека тоа ќе влијае на нивната работа и опстанок.
Вчера Владата делумно ги релаксира мерките, но само во делот дека сега угостителските објекти ќе можат да ги отворат вратите и во внатрешниот, затворен дел, но и натаму само за вакцинирани и за прележани до 45 дена.