Според агенцијата, Божиновска во септември минатата година поднела барање за отпуст од државјанството, но бугарската држава сѐ уште не издала указ за ослободување од државјанство
Целото семејство на македонската министерка за енергетика Сања Божиновска се бугарски државјани, објави бугарската агенција БГНЕС.
„Таткото Перо, мајката Виолета и братот Даниел, како и самата Сања Божиновска, имаат бугарски пасош и се бугарски државјани. За да го добијат документот, тие ги докажале своите бугарски корени и ја декларирале својата бугарска самосвест“,
пишува БГНЕС повикувајќи се на извори од бугарското миинистерство за правда.
Според агенцијата, Божиновска во септември минатата година поднела барање за отпуст од државјанството, но бугарската држава сѐ уште не издала указ за ослободување од државјанство.
„Поднесувањето барање за ослободување од бугарско државјанство не води до автоматско завршување на постапката. Тоа се прави преку посебен декрет и важи и за сегашните бугарски државјани родени во странство и за Бугарите кои се родени на територијата на Бугарија. За конкретното лице (Божиновска) до денес не е издаден указ за ослободување од државјанство. Издавањето на таков указ се врши по темелна проверка за секаков вид на обврски на барателот. Потврдата, вклучително и данокот и имотот, се однесува на сите земји каде што престојувало лицето. Надлежните институции проверуваат и за можни кривични постапки“,
објави БГНЕС додавајќи дека, доколку на Божиновска ѝ треба правна или друга помош, може да се обрати до бугарската амбасада во Скопје, која е должна да ѝ пружи помош.
„360 степени“ во јуни годинава објави дека Божиновска поседува бугарско државјанство и дека со бугарски пасош ја раководела компанијата „Руднап“ во Хрватска. А, за да се добие бугарско државјанство, барателот треба да се декларира дека се чувствува како Бугарин пред тамошните власти и да ги наведе своите бугарски корени.
На прашањето на „360 степени“, дали поседувала или дали во моментот поседува бугарско државјанство и зошто не го декларирала во биографијата приложена кон предлогот за состав на новата влада, Божиновска во јуни негираше дека поседува бугарско државјанство.
„360 степени“ направи дополнителни проверки кои покажаа дека Сања Божиновска побарала отпуст од бугарското државјанство во втората половина на минатата година и дека процедурата сè уште не е завршена. Логично, тоа би значело дека Божиновска сè уште е државјанка на Република Бугарија.
На прашањето дали сè уште поседува бугарско државјанство, Божиновска во петокот повторно негираше.
„Јас поседувам македонско и чешко државјанство. Имам и македонски пасош и чешки пасош“,
ни рече таа.
Со оглед дека повторно децидно не одговори, ја прашавме дали може да стави на увид на јавноста документ од бугарските власти со кој се потврдува дека е прифатено нејзиното барање за отпуст, односно дека веќе не е бугарска државјанка.
„Ќе проверам со адвокатите и ќе ве известам“,
рече таа.
Во изјава за ТВ Канал 5, објавена исто така во јуни годинава, Божиновска призна дека имала бугарски пасош и дека имала бугарско државјанство од кое побарала отпуст, процедура која, според неа, е финализирана. Но, таа не одговорила и дали добила решение за отпуст од државјанството, без што, формално и натаму е бугарска државјанка.
Бугарско државјанство: Кога министерката Сања Божиновска ја говори вистината?