Кандидатката на Левица порача дека останува на ветувањето дека ќе биде единствена меѓу седумтемина претседателски кандидати која ќе се разликува по она што го нуди, по начинот на кој тоа ќе го презентира, аргументите кои ќе ги приложи, притоа нудејќи, како што рече, визија за една поинаква Македонија. Вети чесна и интересна битка, оценувајќи оти никому нема да му биде здодевно тогаш кога ќе го презентира она што има да го каже
На оваа кампања ќе се претставиме скромно, согласно своите можности, онака скромно каков што е скромен и нашиот народ – сиромашен, напатен, обичен, тој не сака билборди. Ова, на денешната прес-конференција со која го означи стартот на изборната кампања за првиот круг од претседателските избори, го порача Билјана Ванковска, кандидатка за шеф на државата поддржана од политичката партија Левица.
„Како што гледате, ја започнуваме изборната кампања токму на денот кога законот го бара тоа. Немавме големи конвенции, филхармонии, хали, хотели, ниту, пак, ќе ги имаме. Тоа зборува за нашиот пристап и разбирање на оваа борба“,
рече Билјана Ванковска на денешната прес-конференција со која ја започна својата кампања за изборите за шеф на државата.
За разлика од кампањата, за која рече дека ќе помине во скромен дух, Ванковска додаде оти изборната програма со која ќе настапи на изборите и со која ќе ја бара поддршката од граѓаните, нема да биде толку скромна зашто, како што кажа, доаѓа од професорка. Својата изборна програма ја оцени за интересно четиво во кое, како што рече, нема „празен од“, а оти низ редовите од секоја страница ќе се најде по некоја провокација и нешто ново.
Порача дека останува на ветувањето дека ќе биде единствена меѓу седумтемина претседателски кандидати која ќе се разликува по она што го нуди, по начинот на кој тоа ќе го презентира, аргументите кои ќе ги приложи, притоа нудејќи, како што рече, визија за една поинаква Македонија.
„Можеби на прв поглед ќе ви се чини дека некои слогани се блиски, дека се слични, дека можеби се збунувачки, но на крајот на оваа кампања верувам дека никој нема да има дилема околу тоа за што се залага Билјана Ванковска заедно со Левица. Во овој материјал ќе ги видите принципите и оние работи кои се водилка во целиот изборен процес, но и оној на кој се надеваме дека ќе биде успешен, затоа што уставните норми се едно – тие се ригидни, сувопарни, навидум не даваат многу можности за креација, но јас сум убедена дека личноста е таа којашто ја прави институцијата, особено кога станува збор за инокосна функција, функција која ја врши еден човек. Тој човек може да остави свој белег, начинот на кој ќе ја исполни со жив дух таа една функција која мнозина ја потценуваат“,
порача претседателската кандидатка на Левица на денешната прес-конференција.
Ванковска ги повика граѓаните да ја проследат нејзината кампања, а потоа да излезат на избори и да не дозволуваат, како што рече, политичките партии да ги доведат во заблуда оти ова е неважниот дел, дека „ова е предјадење, а главното јадење доаѓа на 8 мај кога партиите ќе се борат“.
„Овде имате можност да гласате за личности, без оглед на тоа што зад нас стојат партии, сепак, шестмина од нас својата кандидатура ја потврдија со изворни потписи на граѓаните, што значи дека ние сме независни кандидати поддржани со легитимитет од граѓаните“,
додаде Ванковска.
Кандидатката на Левица вети чесна и интересна битка, оценувајќи оти никому нема да му биде здодевно тогаш кога ќе го презентира она што има да го каже.
Ванковска од вечерва од 19 часот од Струмица го започнува и својот изборен караван.
Седумтемина претседателски кандидати од денеска и официјално ја стартуваат кампањата за првиот круг од изборите за шеф на државата. Почетокот на кампањата е на точно 20 дена од гласачкиот ден, 24 април, а ќе трае до полноќ на 22 април, по што започнува дводневниот изборен молк.