Во сообраќајната несреќа која се случи денеска рано наутро во близина на областа Поликастро, на излезот Евзони, при директен судир на автомобил и автобус со српски регистарски ознаки, животите ги загубија четири лица. Тројца од нив, според медиумските извештаи, починале на самото место, а четвтриот им подлегна на повредите во болница. Во несреќата се повредени десетици патници од српскиот автобус кои со возила на Итна помош се пренесени во болници во неколку градови на северот на Грција
По сообраќајната несреќа автопатот од границата со Северна Македонија е затворен за сообраќај и во двата правци, а возилата се пренасочуваа кон стариот пат
Македонски држвјанин, кој се враќал дома од Кушадаси, се нашол на местото на стравотната сообраќајна несреќа што денеска наутро се случи во северна Грција, недалеку од границата со С Македонија, а во која животите ги загубија четири лица, пишува „Телеграф.рс“.
Несреќата, како што пренесоа грчките медиуми, се случила во близина на областа Поликастро, на излезот Евзони. До неа дошло кога на автомобил во кој се превезувале четворицата загинати директно се судрил со автобус на српска туристичка агенција.
Во сообраќајната несреќа има десетици повредени патници од автобусот, кои се пренесени во неколку болници во повеќе градови на северот на Грција.
Македонскиот државјанин за српски „Телеграф“ изјавил дека на местото пристигнал кратко откако се случила несреќата, а глетката на која наишол била страшна.
„Беше страшно, сè уште сум во шок. Едното возило беше на средината на патот, целото згмечено, а од него преку хаубата висеа две тела, најверојатно возачот и совозачот. Патниците од српскиот автобус не можеа да излезат сè до доаѓањето на Итната помош. Тие (со автобусот н.з.) беа во ендек, но не премногу длабок“,
изјавил македонскиот државјанин за српскиот медиум.
Како што веќе објавивме, собраќајната несреќа се случила кога автомобилот со кој се превезувале четири лица директно се судрил со српскиот автобус. Во автомобилот, според ЕРТ, потоа удрило друго возило, во кое биле 38-годишна жена и нејзиното шестгодишно дете, кои не се повредени, а автобусот се превртел во канал покрај патот.
Веднаш по несреќата била алармирана полиција и противпожарна служба, додека на терен пристигнале возила на брзата помош – ЕКАВ кои пренеле десетици повредени во болниците во Солун, Кукуш и Гумениса. Неколку од нив по извршените превентивни тестови веќе се пуштени на домашно лекување и се во добра здравствена состојба.
Патниците од автобусот, како што пренесува ЕРТ, се пренесени во болницата „Ипократио“ во Солун, а некои полесно повредени во болниците Кукуш и Гумениса. Поточно, 17 од нив се префрлени во „Ипократио“, 26 во болницата во Кукуш и тројца повредени во болницата во Гумениса, додека уште 32 патници се во Поликастро и чекаат да се вратат во Србија.
За несреќата е известена и српската амбасада во Грција, која се очекува да испрати возила за да ги превезат назад во нивната земја.
Во двокатниот српски автобус на туристичка агенција „Ски енд сан“ (Ski&Sun) од Ниш, како што пренесоа повеќето српски медиуми, патувале 78 лица, но според информациите на „Еуроњуз Србија“, во него имало 81 лице.
Директорот на туристичката агенција, Бојан Милосављевиќ за „Еуроњуз Србија“ изјавил дека меѓу српските турсти има и полесно и потешко повредени и дека во тек е нивното згрижување.
По сообраќајната несреќа автопатот од границата со Северна Македонија е затворен за сообраќај и во двата правци, а возилата се пренасочуваа кон стариот пат.