Возилата со странски регистарски таблички ќе може да се регистрираат со 50% намалени давачки, соопшти министерот за економија Крешник Бектеши.
Станува збор за предлог-закон кој попладнево поминал на владина седница и сега ќе се испрати на усвојување во Собранието.
„Сите возила кои заклучно 1 октомври 2020 година влегле на територијата на Северна Македонија и се со странски регистарски таблички ќе можат во рок од една година да се регистрираат во земјата со намалени давачки за 50% од утврдената вредност на сите давачки кои се наплатуваат при увоз од страна на надлежните државни органи“,
посочи Бектеши.
Според предлог-законот, возилата за кои е поднесено барањето за регистрација задолжително треба да ги исполнуваат следните услови:
- сопственикот или корисникот, односно лицето овластено за отуѓување на возилото или лицето кое ќе го купи возилото да ги има регулирано царинските и даночните обврски за возилото во рок од шест месеци од денот на влегувањето во сила на овој закон и да поседува важечка сообраќајна дозвола, осигурување и зелен картон;
- да влегле на територијата на Република Северна Македонија до 1 октомври 2020 година.
Овој предлог-закон ќе стапи во сила 20 дена откако ќе биде усвоен во Собранието и објавен во „Службен весник“.