Министерството за здравство вчера на својот официјален фејсбук-профил, образложувајќи ги причините за разрешувањето на директорот на Клиниката за токсикологија, Данил Петровски, сподели документ во кој има сериозни обвинувања за доктор Нико Беќаровски дека наводно ги навредувал вработените по национална основа. На крајот од писмото стојат потписите, како што е наведено, на вработените со договор на дело
Доктор Нико Беќаровски од Клиниката за Токсикологија најави кривична пријава против вработените со договор на дело на истоимената клиника кои вчера преку писмо, објавено на официјалната фејсбук-страница на Министерството за здравство го обвинија за наводни навреди на национална основа.
„За вакви лаги и клевети, инструирани од само еден лекар, ќе биде покрената кривична пријава против сите потписници. Ви благодарам што го објавите писмото, кое ќе може да биде релевантен судски документ“,
напиша Беќаровски во коментарите под објавата со писмото.
Министерството за здравство вчера на својот официјален фејсбук-профил, образложувајќи ги причините за разрешувањето на директорот на Клиниката за токсикологија, Данил Петровски, сподели документ во кој има сериозни обвинувања за доктор Нико Беќаровски дека наводно ги навредувал вработените по национална основа. На крајот од писмото стојат потписите, како што е наведено, на вработените со договор на дело.
Д-р Нико Беќаровски наводите изнесени во писмото ги нарече лажни и го повика министерот за здравство Илир Демири да се огради „од оваа несреќна објава на сајтот“ и да му се извини за нанесената повреда на честа и угледот.
„Почитуван министер за здравство г. Илир Демири, искрено се надевам дека објавата е без Ваше знаење и одобрение бидејќи со неа ми нанесовте несогледлива штета на мојот углед, базирана на лажни изјави, на незаконски архивиран документ, на кој не стои ниту едно име, за која ќе следува соодветна судска тужба кон инволвираните. Инпутирање какви било национални навреди е најблаго речено дегутантно. И јас, впрочем како и Вие, секогаш сум бил исклучиво поборник за максимален професионализам, базиран на квалитет и мерит систем, без никакви други предрасуди. Најколегијално Ве замолувам во следните 24 часа јавно да се оградите од оваа несреќна објава на сајтот и да ми се извините за нанесената повреда на мојата чест и углед. Воедно, Ве поканувам во текот на идната недела да ја посетите УК за токсикологија и да остварите состанок со стручниот колегиум на Клиниката, за заедно да ги продискутираме наталожените проблеми кои сериозно влијаат на квалитетот на здравствените услуги“,
му напиша Беќаровски на министерот.
Со свој став се огласија и вработените на Клиниката за токсикологија. Тие демантираа наводите во дописот од Министерството за здравство дека проф. д-р Нико Беќаровски ги навредувал колегите Албанци вработени на Клиниката.
„Најостро реагираме и ги демантираме информациите изјавени во неколку медиуми од Министерството за здравство и сме должни на јавноста да ѝ појасниме дека какви било навреди или притисоци на Албанци кои претходно беа ангажирани со договор на дело, од страна на проф. д-р Нико Беќаровски не се упатени. Доктор Нико Беќаровски е врвен професионалец кој повеќе од 10 години работи ургентна медицина и спасува човечки животи без разлика на етничката припадност или припадност на политичка партии, па поврзувањето неговото име со вакви невистини за политички цели е скандалозно и некоректно и поттикнува нетрпение по национална основа“,
стои во потпишаната изјава од вработените на Клиниката.