За саемот за вработување информира првиот вицепремиер и министер за политички систем и односи меѓу заедниците, Артан Груби, кој воедно е и координатор за изградба на коридорите
„Саемот за вработување“ во организација на американско-турскиот конзорциум „Бехтел и Енка“ кој ќе ги гради коридорите 8 и 10-д ќе се одржи утре со почеток во 16 часот во Агенцијата за вработување во Гостивар, а потоа ќе следуваат презентации и во други градови во државата.
“Градиме за новите генерации, модерна инфраструктура која го поврзува регионот со Европа и ја развива економијата на нашата земјата. Со задоволство ве информирам дека конзорциумот ‘Бехтел и Енка’ кој ги гради Коридорот 8 и 10-д оваа недела го организира ‘Саемот за вработување’. Сите заинтересирани за работа ќе имаат можност да се запознаат со можностите што ги нуди овој конзорциум при изградбата на автопатските делници на Коридорите во следните пет години“,
напиша Груби.
Инаку, претходно Уставниот суд оформи предмет за оценување на уставноста на дел од измените на Законот за работни односи, а кои се однесуваат на прекувремената работа на работниците ангажирани на изведбата на коридорите 8 и 10-д, што ќе ги гради американско-турскиот конзорциум „Бехтел и Енка“.
Предметот е оформен по иницијативата што до Уставниот суд ја поднесе Хелсиншкиот комитет за човекови права. Со иницијативата се оспорени членовите 1, 2 и 3 од Законот за изменување и дополнување на Законот за работните односи.
Измените и дополнувањата на вкупно пет закони поврзани со Договорот со „Бехтел и Енка“ за изградба на четири автопатски делници на коридорите 8 и 10-д Собранието ги донесе на 26 мај.
Најмногу контроверзии и реакции во јавната дебата предизвикаа токму измените на Законот за работните односи. Со нив се носи одредба со која ќе се овозможи прекувремена работа подолго од осум часа неделно и повеќе од 190 часа годишно во случаите кога се работи за работи од национален и стратешки интерес за државата, по претходно дадена писмена согласност на работникот.