Како што соопштија од Белата куќа, американскиот претседател ќе разговара со Макрон, Меркел, Драги и со Џонсон
Американскиот претседател Џо Бајден ќе разговара со францускиот претседател Емануел Макрон, германската канцеларка во заминување Ангела Меркел, италијанскиот премиер Марио Драги и британскиот премиер Борис Џонсон, за исходот од денешниот руско-американски видео-самит, соопшти Белата куќа.
Лидерите на Велика Британија, Италија, САД, Франција и Германија изразија загриженост на вчерашниот состанок поради „сè поострата руска реторика“ во врска со Украина, ја повикаа Русија да ги смири тензиите и се согласија дека дипломатијата, особено во рамки на „Нормандискиот формат“, е единствен начин за решавање на конфликтот во Донбас со спроведување на договорот од Минск.
„На вчерашната средба, лидерите се согласија да останат во близок контакт во однос на координиран и сеопфатен пристап како одговор на зајакнувањето на руските трупи на границите на Украина“,
се вели во соопштението.
Американскиот и рускиот претседател Џо Бајден и Владимир Путин денеска одржаа видео конференциска средба која траеше повеќе од два часа, на која разговараа за Украина и за други отворени прашања во американско-руските односи.