Причината зошто Си Ѓинпинг толку се вознемири кога го соборив балонот со два вагона шпионска опрема е затоа што не знаеше дека е таму, рече Бајден
Американскиот претседател Џо Бајден вчера го нарече кинескиот претседател Си Ѓинпинг диктатор и додаде дека Ѓинпинг бил многу засрамен кога неодамна беше соборен кинески шпионски балон што леташе над САД.
Бајден ова го изјави на собирање средства во Калифорнија, еден ден откако американскиот државен секретар Ентони Блинкен се сретна со Ѓинпинг во Пекинг, со цел да се намалат тензиите и ривалството меѓу двете земји.
„Причината зошто Си Ѓинпинг толку се вознемири кога го соборив балонот со два вагона шпионска опрема е затоа што не знаеше дека е таму. Тоа е голема штета за диктаторите. Кога не знаат што се случило. Не требаше да оди таму каде што беше. Го смени курсот“,
рече Бајден.
Имено, балонот на почетокот на февруари една недела леташе над САД и Канада, а беше соборен по наредба на Бајден над Атлантскиот Океан. Тој инцидент, кој предизвика Блинкен да ја одложи првично планираната посета на Пекинг, како и размена на посети меѓу американските и тајванските официјални лица, ги зајакна тензиите меѓу САД и Кина.